امریکی اپیلز کورٹ نے ٹرمپ کی فیڈ گورنر لیزا کُک کو ہٹانے کا فیصلہ مسترد کردیا

امریکی اپیلز کورٹ نے پیر کو صدر ڈونلڈ ٹرمپ کو فیڈرل ریزرو کی گورنر لیزا کُک کو برطرف کرنے کی اجازت دینے سے انکار کر دیا۔ یہ پہلا موقع ہے جب 1913 میں فیڈ کے قیام کے بعد کسی صدر نے ایسے اقدام کی کوشش کی ہے۔

عدالت کے فیصلے کے بعد اب ٹرمپ انتظامیہ کے پاس صرف چند گھنٹے ہیں کہ وہ سپریم کورٹ سے رجوع کرے تاکہ کُک منگل اور بدھ کو ہونے والے فیڈ کے پالیسی اجلاس میں شریک نہ ہو سکے، جہاں شرح سود میں کمی کا امکان ہے۔

ڈسٹرکٹ آف کولمبیا سرکٹ کورٹ نے جسٹس ڈپارٹمنٹ کی یہ درخواست مسترد کر دی کہ کُک کو عارضی طور پر ہٹانے کے فیصلے پر روک لگائی جائے۔ اس سے قبل ڈسٹرکٹ جج جیا کاپ نے 9 ستمبر کو قرار دیا تھا کہ ٹرمپ کے لگائے گئے الزامات — کہ کُک نے عہدہ سنبھالنے سے قبل مارگیج فراڈ کیا — قانونی طور پر برطرفی کے لیے کافی بنیاد نہیں ہیں۔

فیصلہ دو کے مقابلے میں ایک کے تناسب سے آیا، جس میں صدر جو بائیڈن کے نامزد جج بریڈلے گارسیا اور مشیل چائلڈز اکثریت میں تھے، جبکہ ٹرمپ کے مقرر کردہ جج گریگوری کاٹساس نے اختلافی نوٹ لکھا۔

کُک، جو فیڈ کی پہلی سیاہ فام خاتون گورنر ہیں، نے اگست میں ٹرمپ اور فیڈ کے خلاف مقدمہ دائر کیا تھا۔ ان کا مؤقف ہے کہ الزامات محض ایک بہانہ ہیں تاکہ انہیں ان کی مالیاتی پالیسی کے مؤقف کی وجہ سے ہٹایا جا سکے۔ ٹرمپ انتظامیہ کا دعویٰ ہے کہ صدر کے پاس فیڈ گورنر کو ہٹانے کا وسیع اختیار ہے، لیکن عدالت نے قرار دیا کہ کُک کو صفائی کا موقع دیے بغیر برطرفی عمل نہیں ہو سکتا۔

اس مقدمے کے اثرات فیڈ کی خودمختاری اور اس کی شرح سود کے فیصلوں پر پڑ سکتے ہیں، جنہیں سیاسی دباؤ سے آزاد رکھنا مرکزی بینک کے استحکام کے لیے ضروری سمجھا جاتا ہے۔