پاکستان، قطر کا اسرائیلی حملے کے بعد قریبی رابطے میں رہنے پر اتفاق

پاکستان اور قطر نے منگل کو اس بات پر اتفاق کیا کہ خطے کی بدلتی صورتحال، بالخصوص خلیجی ریاست پر اسرائیلی حملے کے بعد وہ قریبی رابطے میں رہیں گے۔

وزیرِاعظم ہاؤس سے جاری کردہ بیان کے مطابق وزیرِاعظم شہبازشریف سے دوحہ میں منعقدہ ہنگامی عرب۔اسلامی سربراہی اجلاس کے موقع پر قطر کے امیر شیخ تمیم بن حمد الثانی نے ملاقات کی۔

اس موقع پر نائب وزیرِاعظم و وزیرِخارجہ اسحاق ڈار اور چیف آف آرمی اسٹاف فیلڈ مارشل جنرل سید عاصم منیر بھی موجود تھے۔

ملاقات کے دوران وزیراعظم نے دوحہ کے رہائشی علاقے پر اسرائیلی حملے کی شدید مذمت دہراتے ہوئے اس نازک وقت میں قطر کے ساتھ بھرپور تعاون اور یکجہتی کے عزم کا اعادہ کیا۔

وزیراعظم ہاؤس کے مطابق وزیراعظم نے 9 ستمبر کے اسرائیلی حملے کو قطر کی خودمختاری اور علاقائی سالمیت کی صریح خلاف ورزی اور بین الاقوامی قانون کی سنگین خلاف ورزی قرار دیا۔

وزیراعظم نے ایک بار پھر اس بات پر زور دیا کہ پاکستان اور قطر کے برادرانہ تعلقات تاریخی، دیرینہ اور مستحکم ہیں اور آنے والے دنوں میں یہ تعلقات مزید مضبوط ہوں گے۔

شہبازشریف نے واضح کیا کہ مشرق وسطیٰ میں اسرائیلی جارحیت کو فوری طور پر روکا جانا چاہیے اور اسرائیلی اشتعال انگیزیوں کے پیشِ نظر امتِ مسلمہ کے درمیان اتحاد نہایت اہم ہے۔

ملاقات کے دوران وزیراعظم نے یہ بھی یاد دلایا کہ قطر کی درخواست پر پاکستان نے مشرق وسطیٰ کی بگڑتی ہوئی صورتحال پر غور کیلئے اقوام متحدہ کی سلامتی کونسل کا ہنگامی اجلاس بلانے کی کوشش کی تھی۔

امیرِ قطر نے وزیراعظم کے دوحہ کے دورے اور ہنگامی عرب۔اسلامی سربراہی اجلاس میں شرکت پر ان کا شکریہ ادا کیا۔

گزشتہ ہفتے اسرائیل نے بین الاقوامی قوانین اور علاقائی خودمختاری کی خلاف ورزی کرتے ہوئے قطر میں متعدد حملے کیے جن میں حماس کے پانچ ارکان (جن میں کوئی اعلیٰ رہنما شامل نہیں تھا) اور قطر کے ایک بیس سالہ سکیورٹی اہلکار جاں بحق ہوگئے۔

اس بلاجواز فوجی جارحیت کی مختلف ممالک نے مذمت کی۔