اچھے تعلقات یا دہشتگردوں کی پناہ،کابل کو واضح فیصلہ کرنا ہوگا: وزیراعظم

وزیرِاعظم محمد شہباز شریف نے کہا ہے کہ پوری قوم اپنی بہادر مسلح افواج کے ساتھ مل کر دہشت گردی اور غیر ملکی سرپرستی یافتہ پراکسیز کے خلاف متحد ہے، خصوصاً وہ عناصر جو بھارت کی پشت پناہی سے خیبر پختونخوا میں تخریبی سرگرمیوں میں ملوث ہیں۔

یہ بات انہوں نے بنوں کے کمبائنڈ ملٹری اسپتال (سی ایم ایچ) میں میڈیا سے گفتگو کرتے ہوئے کہی، جہاں انہوں نے حالیہ جنوبی وزیرستان آپریشن میں زخمی ہونے والے جوانوں کی عیادت کی۔ اس موقع پر چیف آف آرمی اسٹاف فیلڈ مارشل سید عاصم منیر اور کور کمانڈر پشاور بھی موجود تھے۔ وزیرِاعظم نے جوانوں کے جذبۂ قربانی، حوصلے اور خدمتِ وطن کے عزم کو خراجِ تحسین پیش کیا۔

اس سے قبل وزیرِاعظم نے شہید ہونے والے جوانوں کی نمازِ جنازہ میں شرکت کی اور انہیں قوم کے اصل ہیرو قرار دیتے ہوئے کہا کہ ان کی قربانیاں رائیگاں نہیں جائیں گی۔

وزیرِاعظم نے کہا کہ پاکستان تمام ہمسایہ ممالک سے پرامن تعلقات چاہتا ہے، تاہم افغانستان کی عبوری حکومت کو فیصلہ کرنا ہوگا کہ وہ پاکستان کے ساتھ خوشگوار تعلقات رکھنا چاہتی ہے یا فتنۃ الخوارج اور کالعدم ٹی ٹی پی کی سرپرستی جاری رکھنا۔ انہوں نے واضح کیا کہ دشمن قوتوں کو پاکستان میں امن خراب کرنے کی اجازت نہیں دی جائے گی۔

شہباز شریف نے اعلان کیا کہ جلد ہی وفاقی کابینہ کا ایک اہم اجلاس طلب کیا جائے گا تاکہ دہشت گردی کے خلاف جامع حکمت عملی وضع کی جا سکے۔ انہوں نے کہا کہ افغان شہری حالیہ حملوں اور سرحد پار دراندازی میں ملوث ہیں، اس لیے غیر قانونی طور پر مقیم افغان باشندوں کی جلد واپسی ناگزیر ہے۔

وزیرِاعظم نے بھارت پر بھی دہشت گردوں کو سہولت دینے کا الزام لگاتے ہوئے کہا کہ بھارتی پراکسیز کے حملوں کا بھرپور جواب دیا جائے گا۔ انہوں نے خبردار کیا کہ جو کوئی بھی بھارتی پراکسیز کے سہولت کار بنے گا، اسے بھی اسی زبان میں جواب دیا جائے گا۔

بنوں کینٹ آمد پر وزیرِاعظم کو خطے کی سلامتی کی صورتحال پر تفصیلی بریفنگ دی گئی۔ انہوں نے کہا کہ قوم اور افواج پاکستان مل کر دہشت گردوں کے ناپاک عزائم کو ناکام بنائیں گے۔