ماسٹر چنگا ن:مقبول ترین گاڑیوں کاروان ،شیرپا کے اپ گریڈڈ ماڈل متعارف

پاکستان کے کمرشل اور فیملی موبلیٹی سیکٹر میں ایک اہم پیشرفت کے طور پر، ماسٹر چنگان موٹرز لمیٹڈ نے اپنی مقبول ترین گاڑیوں کاروان اور شیرپا کے جدید اور اپ گریڈڈ ماڈلز متعارف کروا دیے ہیں۔

لاہور میں منعقدہ شاندار لانچ تقریب میں کمپنی نے چانگان کاروان کے لیے ایک اہم سنگ میل کا اعلان کیا کہ پاکستان میں اس کی فروخت 25,000 یونٹس سے تجاوز کر گئی ہے۔ پانچ سال قبل متعارف کروائی گئی کاروان نے اپنی کیٹیگری میں قائدانہ مقام حاصل کیا ہے اور 7 نشستوں والی ایم پی وی سیگمنٹ میں 52 فیصد سے زائد مارکیٹ شیئر کا حامل ہے۔ ایک زمانے میں کم توجہ حاصل کرنے والی یہ ملٹی پرپز وین اب جدید ڈیزائن، جدید ٹیکنالوجی اور طاقت کے لحاظ سے مسلسل ترقی کر رہی ہے۔

نئے متعارف شدہ کاروان پاور پلس یو جی میں انجن کی قابلِ ذکر اپ گریڈ ہے، جہاں پچھلے 1.0 لیٹر انجن کی جگہ اب 1.2 لیٹر کا طاقتور انجن دیا گیا ہے جو 44 فیصد زیادہ ہارس پاور کے ساتھ بہتر ایندھن کی کارکردگی بھی فراہم کرتا ہے۔ کمپنی نے کارکردگی کے ساتھ ساتھ حفاظت کو بھی اولین ترجیح دی ہے، اور ڈرائیور و فرنٹ مسافر دونوں کے لیے ڈوئل ایئر بیگز، ای بی ڈی کے ساتھ اے بی ایس بریکنگ سسٹم، اور ریئر پارکنگ سنسرز متعارف کرائے ہیں جو اس کیٹیگری میں پہلی بار پیش کیے گئے ہیں۔

تقریب سے خطاب کرتے ہوئے ماسٹر چنگان موٹرز کے سی ای او دانیال ملک نے کہا کہ کاروان محض ایک گاڑی نہیں بلکہ ایک تحریک ہے۔ اس نے سات نشستوں والی وین سے متعلق لوگوں کی توقعات کو بدل کر روزمرہ کی نقل و حمل میں وقار، جدید ڈیزائن اور بھروسے کا معیار قائم کیا ہے۔ آج ہم فخر کے ساتھ اس سفر کو اپ گریڈڈ کاروان یو جی اور اگلی نسل کی شرپا پاور 1.2 کے ساتھ آگے بڑھا رہے ہیں۔