جولائی میں 3.2 ارب ڈالر کی ترسیلات موصول
- سالانہ بنیاد پر ترسیلات زر میں 7.4 فیصد اضافہ ریکارڈ کیا گیا، اسٹیٹ بینک
جولائی 2025 کے دوران بیرونِ ملک مقیم پاکستانیوں کی ترسیلات زر کا حجم 3.2 ارب ڈالر رہا۔
اسٹیٹ بینک آف پاکستان (ایس بی پی) کے اعدادوشمار کے مطابق سالانہ بنیاد پر ترسیلات زر میں 7.4 فیصد اضافہ ہوا، جو گزشتہ سال کے اسی مہینے میں ریکارڈ شدہ 3 ارب ڈالر کے مقابلے میں ہے۔ تاہم ماہانہ بنیاد پر ترسیلات زر میں 6 فیصد کمی دیکھی گئی جو جون میں 3.4 ارب ڈالر تھیں۔
ہوم ریمیٹنسس ملک کے بیرونی اکاؤنٹ کو مستحکم کرنے، پاکستان کی معاشی سرگرمیوں کو فروغ دینے اور ترسیلات پر انحصار کرنے والے خاندانوں کی قابلِ خرچ آمدنی بڑھانے میں اہم کردار ادا کرتی ہیں۔
ترسیلات زر کی تفصیلات
جولائی 2025 میں سعودی عرب میں مقیم پاکستانیوں نے سب سے زیادہ ترسیلات زر بھیجی، جو 823.7 ملین ڈالر رہی۔ یہ رقم گزشتہ سال کے اسی مہینے میں بھیجی گئی 760 ملین ڈالر سے تقریباً 8 فیصد زیادہ ہے۔
متحدہ عرب امارات (یو اے ای) سے ترسیلات زر میں سالانہ بنیاد پر 9 فیصد اضافہ ہوا، جو جولائی میں 611.2 ملین ڈالر سے بڑھ کر 665.2 ملین ڈالر ہو گئی۔ ماہانہ بنیاد پر ترسیلات زر میں 7 فیصد کمی ہوئی، جو جون میں رپورٹ شدہ 717.2 ملین ڈالر کے مقابلے میں کم ہے۔
برطانیہ سے جولائی میں ترسیلات زر 450.4 ملین ڈالر رہیں، جو جون 2025 میں 537.6 ملین ڈالر کے مقابلے میں 16 فیصد کمی ظاہر کرتی ہیں۔ تاہم، سالانہ بنیاد پر برطانیہ سے ترسیلات زر میں 2 فیصد اضافہ ریکارڈ کیا گیا۔
جولائی 2025 میں امریکہ میں مقیم پاکستانیوں نے 269.6 ملین ڈالر ترسیل کیے، جو ماہانہ بنیاد پر 4 فیصد اور سالانہ 10 فیصد کمی ظاہر کرتا ہے۔
Comments
Comments are closed.