پاکستان سنگل ونڈو، آٹو مینوفیکچررز اب درآمدی کوٹہ کیلئے ڈیجیٹلی درخواست دے سکیں گے

گاڑیوں کے مینوفیکچررز کو اب حکومت کے انجینئرنگ ڈیولپمنٹ بورڈ (ای ڈی بی) سے درآمدی کوٹہ جاری کرنے کے لیے دستی طور پر درخواست دینے کی ضرورت نہیں، کیونکہ بورڈ نے 17 جولائی 2025 سے کامیابی کے ساتھ پاکستان سنگل ونڈو (پی ایس ڈبلیو) کے ساتھ انضمام کر لیا ہے۔

پی ایس ڈبلیوایک ڈیجیٹل پلیٹ فارم ہے جو مرکزی اور کاغذ سے پاک تجارت کو ممکن بناتا ہے، جس کے ذریعے درآمدات، برآمدات اور ٹرانزٹ میں شامل فریقین ایک ہی انٹری پوائنٹ سے معلومات اور دستاویزات جمع کرا سکتے ہیں۔

یہ اقدام کاروبار کرنے میں آسانی پیدا کرنے اور ریگولیٹری منظوریوں میں شفافیت کو یقینی بنانے کے لیے کیا گیا ہے۔ یہ آٹوموٹیو مینوفیکچررز اور اوریجنل ایکوئپمنٹ مینوفیکچررز (او ای ایمز) کو برقی طور پر درآمدی کوٹہ کی منظوری کی درخواستیں کسٹمز کو مزید کارروائی کے لیے جمع کرانے کے قابل بنائے گا۔ مینوفیکچررز اور او ای ایمز سے کہا گیا ہے کہ وہ 17 جولائی سے پی ایس ڈبلیو یوزر آئی ڈیز حاصل کریں۔

اب تمام درخواستیں پی ایس ڈبلیو کے ذریعے جمع کرائی جائیں گی اور کوئی دستی درخواست براہ راست ای ڈی بی کو جمع یا پروسیس نہیں کی جائے گی۔ ڈیٹا دونوں سسٹمز، پی ایس ڈبلیو اور وی بوک — جو پاکستان کسٹمز کا الیکٹرانک کلیئرنس پلیٹ فارم ہے — میں محفوظ کیا جائے گا، تاکہ ہموار پراسیسنگ اور ریکارڈ کی سالمیت کے ساتھ ساتھ کسٹمز اورای ڈی بی کو حقیقی وقت میں نظر آئے۔ ای ڈی بی کے اعداد و شمار کے مطابق، 100 سے زائد او ای ایمز اس محکمے میں رجسٹرڈ ہیں۔

بزنس ریکارڈر سے بات کرتے ہوئے پی ایس ڈبلیو ٹیم نے بتایا کہ اس سے پہلے، آٹوموٹیو مینوفیکچررز کو ایس آر او 656(I)/2006 مورخہ 22 جون 2022 کے تحت اجزا کی درآمد پر چھوٹ اور مراعات حاصل کرنے کے لیے ای ڈی بی سے درآمدی کوٹہ جاری کرنے کی دستی درخواست دینا پڑتی تھی۔ یہ کاغذی عمل وقت طلب تھا اور اس میں شفافیت کی کمی تھی کیونکہ مینوفیکچررز کو اپنی درخواستوں کی حیثیت کے بارے میں کوئی معلومات نہیں ہوتی تھیں۔

مکمل ڈیجیٹل نظام

ان چیلنجوں سے نمٹنے کے لیے، پی ایس ڈبلیو نے ای ڈی بی اور او ای ایمز کے ساتھ مشاورت سے مکمل ڈیجیٹل نظام تیار اور لانچ کیا ہے۔ نیا نظام او ای ایمز کو پی ایس ڈبلیو پلیٹ فارم کے ذریعے الیکٹرانک طور پر ای ڈی بی کو اپنی کوٹہ درخواستیں جمع کرانے کی اجازت دیتا ہے، جس سے فزیکل دستاویزات کی ضرورت ختم ہو جاتی ہے اور او ای ایمز کے لیے درخواست کی حیثیت کی حقیقی وقت میں نگرانی اور ٹریکنگ ممکن ہو جاتی ہے۔

مزید یہ کہ ای ڈی بی سے کسی بھی اضافی معلومات یا وضاحت کی درخواستیں بھی پی ایس ڈبلیو پلیٹ فارم کے ذریعے نمٹائی جائیں گی، جو اسٹیک ہولڈرز کے درمیان ہموار اور شفاف مواصلات کو یقینی بنائے گا۔

جب ای ڈی بی کی طرف سے منظوری ملے گی، تو درآمدی کوٹہ وی بوک نظام کے ساتھ مربوط ہو جائے گا، جس سے مینوفیکچررز اجزاء کی درآمد کے دوران براہ راست اس کوٹے کا استعمال کر سکیں گے۔

نیا شروع کیا گیا ڈیجیٹل نظام دستی، کاغذی کارروائی کی ضرورت کو ختم کرتا ہے اور تقریباً 32 کاغذی دستاویزات کو متعلقہ ایجنسیوں کی طرف سے حقیقی وقت کی الیکٹرانک تصدیقات سے بدل دیتا ہے۔ اس تبدیلی سے توقع کی جاتی ہے کہ او ای ایمز کے لیے ای ڈی بی سے کوٹہ منظوری حاصل کرنے میں وقت اور لاگت میں نمایاں کمی آئے گی۔

مزید برآں، پی ایس ڈبلیو کا ڈیجیٹل پراسیسنگ نظام درخواست کی ٹریکنگ کو بہتر بناتا ہے، جس کے نتیجے میں پورے عمل کے دوران زیادہ شفافیت اور کارکردگی پیدا ہوتی ہے۔ آخر میں، بہتر ڈیٹا ویسبلیٹی اور تجزیات باخبر فیصلے کرنے میں مدد فراہم کریں گے۔

پی ایس ڈبلیو کے حکام کے مطابق، او ای ایمز کی اشیا کی کلیئرنس میں درپیش چیلنجوں کو حل کرنے والے زیادہ مؤثر نظام کے ڈیزائن کے لیے کلیدی اسٹیک ہولڈرز کے ساتھ متعدد مشاورتی سیشنز منعقد کیے گئے۔ اس کے بعد پی ایس ڈبلیو اور ای ڈی بی کی مشترکہ قیادت میں جامع تبدیلی مینجمنٹ سیشنز ہوئے تاکہ اسٹیک ہولڈرز کو نئے ڈیجیٹل نظام کے استعمال پر تربیت دی جا سکے، جس سے دستی سے الیکٹرانک پلیٹ فارم پر ہموار منتقلی کو یقینی بنایا جا سکے۔

100 سے زائد او ای ایمز آٹو پارٹس کی تیاری/اسمبلنگ میں مصروف ہیں۔ انہوں نے اس نئی پہل کا خیرمقدم کیا اور پی ایس ڈبلیو کے ڈیجیٹل حل کی تعریف کی، اس بات کو تسلیم کرتے ہوئے کہ اس میں پچھلے کاغذی نظام میں موجود تکرار اور غیر مؤثریت کو ختم کرنے کی صلاحیت ہے۔

پی ایس ڈبلیو ایک ایسا ڈیجیٹل پلیٹ فارم فراہم کرتا ہے جو سرحد پار تجارت میں شامل متعدد اسٹیک ہولڈرز کو یکجا کرتا ہے تاکہ سرحد پار تجارت میں وقت اور لاگت دونوں کو کم کیا جا سکے۔

پی ایس ڈبلیو بنیادی طور پر درآمدی، برآمدی اور ٹرانزٹ اشیا کی کسٹمز اور ریگولیٹری کلیئرنس کے انضمام کے لیے ایک پلیٹ فارم کے طور پر کام کرتا ہے اور یہ کارگو رپورٹنگ، مینجمنٹ اور کلیئرنس طریقہ کار کے لیے ایک ہم آہنگ اور مربوط نقطہ نظر پر مبنی ہے۔ پاکستان سنگل ونڈو کا فیز ون 30 جون 2022 کو شروع کیا گیا تھا، اور یہ پلیٹ فارم مسلسل نئی خدمات، فیچرز اور اداروں کو شامل کر رہا ہے۔