پنجاب، خیبرپختونخوا میں تیز ہواؤں اور بارش کا امکان ہے، محکمہ موسمیات

محکمہ موسمیات پاکستان (پی ایم ڈی) نے بدھ کے روز خبردار کیا ہے کہ پنجاب اور خیبرپختونخوا کے مختلف علاقوں میں آئندہ 12 سے 24 گھنٹوں کے دوران موسلادھار بارش کے ساتھ تیز اور جھکڑ نما ہوائیں چلنے کا امکان ہے۔

محکمہ موسمیات کی ایڈوائزری کے مطابق خیبرپختونخوا کے مختلف اضلاع بشمول چترال، دیر، سوات، کالام، مانسہرہ، بٹگرام، ایبٹ آباد، ہری پور، صوابی، مردان، پشاور، چارسدہ، کوہاٹ، ہنگو اور ملحقہ علاقوں میں شدید بارش اور جھکڑ چلنے کا خدشہ ہے۔

اسی طرح پنجاب کے کئی اضلاع میں وقفے وقفے سے موسلادھار بارش متوقع ہے، جن میں اسلام آباد، راولپنڈی، جہلم، چکوال، تلہ گنگ، منڈی بہاؤالدین، گجرات، گوجرانوالہ، نارووال، حافظ آباد، چنیوٹ، لاہور، سیالکوٹ، سرگودھا، فیصل آباد، قصور، اوکاڑہ، ساہیوال، پاکپتن اور گردونواح کے علاقے شامل ہیں۔

محکمہ موسمیات نے خبردار کیا ہے کہ ان موسمی حالات کے نتیجے میں درخت گرنے، بجلی کی بندش، کمزور عمارتوں کو نقصان پہنچنے اور دھند یا بارش کے باعث حدِ نگاہ میں کمی جیسے مسائل پیدا ہو سکتے ہیں، جو ٹریفک میں خلل اور حادثات کا سبب بن سکتے ہیں۔

عوام الناس کو ہدایت کی گئی ہے کہ درختوں، ہورڈنگز اور خستہ حال عمارتوں سے دور رہیں، گاڑیاں محفوظ جگہوں پر پارک کریں، غیر ضروری سفر سے گریز کریں اور مقامی انتظامیہ کی ہدایات پر عمل کرتے ہوئے تازہ ترین موسم کی معلومات سے باخبر رہیں۔