پاکستان، افغانستان اور ازبکستان کا یو اے پی کوریڈور کے تحت ریل رابطے کا معاہدہ

پاکستان، افغانستان اور ازبکستان نے جمعرات کے روز نائب آباد خرلاچی ریل لنک کے مشترکہ فزیبلٹی مطالعے کے لیے ایک فریم ورک معاہدے پر دستخط کیے ہیں، جو ازبکستان ،افغانستان ، پاکستان (یو اے پی) ریلوے کوریڈور منصوبے کی جانب ایک اہم پیش رفت ہے۔

اس موقع پر پاکستان کی نمائندگی نائب وزیرِاعظم و وزیرِ خارجہ سینیٹر محمد اسحاق ڈار نے کی، جنہوں نے کابل میں معاہدے پر دستخطوں کی تقریب میں شرکت کی۔

ان کے ہمراہ ایک اعلیٰ سطح کا وفد بھی تھا، جس میں وزیرِ ریلوے، افغانستان کے لیے وزیرِاعظم کے خصوصی نمائندے اور وزارتِ ریلوے کے سینئر حکام شامل تھے۔

سینیٹر اسحاق ڈار نے سوشل میڈیا پلیٹ فارم ’ایکس‘ پر اپنے بیان میں تینوں ممالک کی حکومتوں اور عوام کو مبارکباد دی ہے اور یو اے پی ریلوے کوریڈور کو ”علاقائی روابط اور اقتصادی انضمام کی جانب ایک اہم سنگِ میل“ قرار دیا۔

انہوں نے کہا کہ یہ کوریڈور وسطی ایشیائی ممالک کو افغانستان کے راستے پاکستان کی بندرگاہوں سے منسلک کرے گا، جس سے خطے میں تجارت اور ٹرانزٹ کو فروغ ملے گا۔

اسحاق ڈار نے معاہدے کے مذاکراتی عمل کے دوران حمایت اور وابستگی پر ازبکستان کے وزیرِ خارجہ بختیار سعیدوف اور افغانستان کے قائم مقام وزیرِ خارجہ امیر خان متقی کا شکریہ بھی ادا کیا۔

انہوں نے مزید کہا کہ ”آج کے معاہدے پر دستخط اُس قیادت اور عزم کا نتیجہ ہیں جس کا مظاہرہ گزشتہ پی ڈی ایم حکومت (2022-23) کے دور میں وزیرِاعظم شہباز شریف کی زیر قیادت کیا گیا اور مجھے بطور وزیرِ خزانہ اس کوشش کی قیادت کی ذمہ داری سونپی گئی تاکہ ہم اپنے برادر ممالک کے ساتھ اس منصوبے کو آگے بڑھا سکیں۔“

دورے کے موقع پر نائب وزیرِاعظم و وزیرِ خارجہ اسحاق ڈار نے افغانستان کے قائم مقام وزیرِ خارجہ امیر خان متقی سے ملاقات بھی کی۔

ترجمان دفترِ خارجہ کے مطابق دونوں فریقین نے دوطرفہ تعلقات میں تسلسل کو برقرار رکھنے اور تجارت، ٹرانزٹ اور سیکیورٹی کے شعبوں میں تعاون کو وسعت دینے کے لیے مشترکہ کوششیں تیز کرنے پر زور دیا ہے۔

دونوں رہنماؤں نے اس بات پر بھی اتفاق کیا کہ خطے کی اقتصادی ترقی کی مکمل صلاحیت کو بروئے کار لانے کے لیے رابطے میں رہنا، خصوصاً یو اے پی ریلوے کوریڈور جیسے بین العلاقائی رابطہ منصوبوں کی تکمیل کے ذریعے، ضروری ہے۔