پاکستان اور روس کا تجارت، توانائی اور دفاع کے شعبوں میں تعلقات بڑھانے پر اتفاق

پاکستان اور روس نے تجارت، توانائی، زراعت اور دفاع کے شعبوں میں دوطرفہ تعاون مزید بڑھانے پر اتفاق کیا ہے۔

یہ اتفاق نائب وزیرِ اعظم و وزیرِ خارجہ اسحاق ڈار اور روسی وزیرِ خارجہ سرگئی لاؤروف کے درمیان چین کے شہر تیانجن میں شنگھائی تعاون تنظیم (ایس سی او) کے وزرائے خارجہ کونسل کے اجلاس کے موقع پر ملاقات میں ہوا۔

نائب وزیرِ اعظم کے دفتر کی جانب سے جاری بیان میں کہا گیا ہے کہ ملاقات کے دوران دونوں رہنماؤں نے دوطرفہ تعلقات کی مثبت سمت پر اطمینان کا اظہار کیا۔

اس موقع پر وزیرِ خارجہ نے روسی ہم منصب سرگئی لاؤروف کو پاکستان کے دورے کی دعوت بھی دہرائی۔

اسحاق ڈار نے بیجنگ میں ’’گریٹ ہال آف دی پیپل‘‘ میں چینی صدر شی جن پنگ سے بھی ملاقات کی اور پاکستانی قیادت، حکومت اور عوام کی جانب سے ان کے لیے نیک خواہشات پہنچائیں۔

وزیر خارجہ نے سوشل میڈیا پلیٹ فارم ایکس (ایکس) پر اپنے پیغام میں کہا ہے کہ بطور فولادی بھائی اور ہر موسم کے اسٹریٹجک شراکت دار، پاکستان اور چین اپنی پائیدار دوستی کو مزید مضبوط کرنے اور مشترکہ علاقائی اہداف کے فروغ کے لیے پرعزم ہیں۔

یہ ملاقات بھی شنگھائی تعاون تنظیم کے وزرائے خارجہ کونسل اجلاس کے موقع پر ہوئی۔

دوسری جانب وزیر خارجہ ڈار نے رکن ممالک کے وزرائے خارجہ کے ہمراہ چینی صدر شی جن پنگ سے مشترکہ ملاقات میں بھی پاکستان کی نمائندگی کی۔ چینی صدر نے وفود کے سربراہان کا خیرمقدم کرتے ہوئے شنگھائی تعاون تنظیم کے دائرہ کار میں علاقائی تعاون کی اہمیت پر زور دیا۔ یہ تنظیم یوریشیائی خطے اور دنیا کی بڑی آبادی پر مشتمل ہے، ریڈیو پاکستان نے رپورٹ کیا۔

سینیٹر اسحاق ڈار پیر کے روز3 روزہ ایس سی او وزرائے خارجہ کونسل کے اجلاس میں شرکت کے لیے تیانجن، چین پہنچے۔ وہ یہ دورہ چینی وزیر خارجہ وانگ ای کی دعوت پر کر رہے ہیں۔