ایف بی آر کو سیاسی انتقام کے لیے استعمال نہیں کیا گیا، چیئرمین راشد محمود لنگڑیال

فیڈرل بورڈ آف ریونیو (ایف بی آر) کے چیئرمین راشد محمود لنگڑیال نے بدھ کے روز واضح الفاظ میں کہا کہ ایف بی آر کو کبھی بھی سیاستدانوں کے خلاف سیاسی انتقامی کارروائیوں کے لیے استعمال نہیں کیا گیا، اور اس پر ایسے کسی کیس بنانے کے لیے کوئی دباؤ نہیں ہے۔

سینیٹ کی قائمہ کمیٹی برائے خزانہ کو بریفنگ دیتے ہوئے چیئرمین ایف بی آر نے کہا: “میں کمیٹی کو یقین دلاتا ہوں کہ ایف بی آر میں کوئی سیاسی انتقام نہیں لیا جا رہا اور ہمیں اعلیٰ حکام کی طرف سے اس نوعیت کے کسی اقدام کا کوئی حکم نہیں ملا۔ ایف بی آر میں سیاستدانوں کی مداخلت مکمل طور پر ختم ہو چکی ہے۔

انہوں نے بتایا کہ ایف بی آر نے فیلڈ فارمیشنز میں پسند کی پوسٹنگز کے لیے دباؤ ڈالنے والے ٹیکس افسران کو فوری معطلی کی وارننگ جاری کر دی ہے۔

اس ضمن میں چیئرمین ایف بی آر نے ایف بی آر کے تمام محکموں کو ایک خط جاری کیا ہے، جس میں انتظامی معاملات میں افسران یا اہلکاروں کی جانب سے بیرونی اثر و رسوخ استعمال کرنے پر سختی سے روکا گیا ہے۔

سینیٹ کی قائمہ کمیٹی برائے خزانہ و ریونیو، جس کی صدارت سینیٹر سلیم مانڈوی والا کر رہے تھے، کو بجٹ 26-2025 کی مشاورت کے دوران دی گئی سفارشات کی تازہ صورتحال پر تفصیلی بریفنگ دی گئی۔

سینیٹر افنان اللہ خان نے کمیٹی کو بتایا کہ ایف بی آر اہلکاروں کی جانب سے سینیٹرز کو ہراساں کرنے کے واقعات پیش آئے ہیں۔ انہوں نے کہا کہ ان کے نام سے رجسٹرڈ آئی ٹی کمپنی کو ایف بی آر کی جانب سے نوٹس جاری کیا گیا، حالانکہ وہ منصوبہ کووِڈ کے باعث مکمل ہی نہیں ہو سکا۔ انہوں نے نشاندہی کی کہ ایف بی آر نے اُس منصوبے پر انکم ٹیکس طلب کیا۔

چیئرمین ایف بی آر نے معاملے کی فوری اور مکمل جانچ کی یقین دہانی کرواتے ہوئے کہا کہ معاملے کو بغیر کسی تاخیر کے دیکھا جائے گا۔

سینیٹر افنان اللہ خان نے مزید الزام لگایا کہ کارپوریٹ ٹیکس آفس اسلام آباد کے ایڈیشنل کمشنر علی جعفر نے ان کی کمپنی کے خلاف غلط کیس بنایا۔

چیئرمین ایف بی آر نے جواب دیا کہ اگر متعلقہ ٹیکس افسر قصوروار پایا گیا تو اس کے خلاف کارروائی کی جائے گی اور اسے سزا دی جائے گی۔

سینیٹر محسن عزیز نے کہا کہ یہ حقیقت ہے کہ کئی ٹیکس دہندگان کے خلاف مقدمات دوبارہ کھولے جا رہے ہیں۔

اس پر چیئرمین ایف بی آر نے وضاحت کی کہ میں نے پوری ٹیکس مشینری کو واضح ہدایت دی ہے کہ ان کا کام صرف واجب الادا ٹیکس کی وصولی ہے۔ ان افسران کو اضافی ٹیکس جمع کرنے کا کوئی ٹاسک نہیں دیا گیا بلکہ صرف درست اور واجب الادا ٹیکس لینا ان کی ذمہ داری ہے۔

اجلاس میں پاکستان اور ایران کے درمیان حالیہ بارٹر ٹریڈ (اشیا کے بدلے اشیا کا کاروبار) پر بھی گفتگو ہوئی، جس پر حکام نے بتایا کہ وزارت تجارت نے دونوں فریقین کی باہمی مفاہمت کی بنیاد پر بارٹر ٹریڈ کا آغاز کر دیا ہے، اور اس کے حتمی انتظامات ایف بی آر اور اسٹیٹ بینک آف پاکستان کی منظوری کے بعد مکمل ہوں گے۔

کاپی رائٹ بزنس ریکارڈر، 2025