محمد شہزاد حبیب نے اپنے خاندان اور قریبی ساتھیوں کے ہمراہ پاکستان جنرل انشورنس کمپنی لمیٹڈ (پی کے جی آئی) کے 7.64 فیصد حصص کے حصول کے لیے باضابطہ طور پر عوامی پیشکش کا آغاز کردیا ہے۔
یہ پیشکش سیکیورٹیز ایکٹ 2015 اور اس سے متعلق ٹیک اوور ریگولیشنز کے تحت دی گئی ہے۔ اس حوالے سے کمپنی نے پیر کو پاکستان اسٹاک ایکسچینج کو ایک نوٹس کے ذریعے مطلع کیا۔
نوٹس کے مطابق، یہ پیشکش 38,22,101 عام شیئرز (7.64 فیصد) کے حصول کے لیے دی گئی ہے، تاہم اس کی منظوری مشروط ہے کہ کم از کم 26,75,471 شیئرز (5.35 فیصد) کی قبولیت حاصل ہو۔
کمپنی نے بتایا کہ اس عوامی پیشکش کا باضابطہ اعلان 22 مئی 2025 کو کیا گیا، جس کے بعد حصولی عمل کا باقاعدہ آغاز ہوا۔
نوٹس میں مزید کہا گیا ہے کہ پی کے جی آئی کے حصص یافتگان کو آفر لیٹرز ارسال کر دیے گئے ہیں، تاکہ وہ اپنی شرکت کا فیصلہ کرسکیں۔
عوامی پیشکش کے اعلان کے مطابق شیئرز کی قبولیت کی مدت 9 جولائی 2025 سے 15 جولائی 2025 تک مقرر کی گئی ہے۔
Comments
Comments are closed.