اوپیک پلس کی جانب سے ممکنہ سپلائی بڑھنے سے تیل کی قیمتوں میں کمی

پیر کے روز مشرق وسطیٰ میں جغرافیائی کشیدگی میں کمی اور اگست میں اوپیک پلس کی ممکنہ پیداوار میں اضافے کی خبروں کے بعد تیل کی قیمتوں میں 1 فیصد کمی دیکھی گئی۔

برینٹ خام تیل کے اگست کے معاہدے 66 سینٹ یا 0.97 فیصد کم ہو کر 67.11 ڈالر فی بیرل پر آ گئی۔ ستمبر کا معاہدہ 83 سینٹ کی کمی کے ساتھ 65.97 ڈالر پر ٹریڈ کر رہا تھا۔

امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 94 سینٹ یا 1.43 فیصد کی کمی کے ساتھ 64.58 ڈالر فی بیرل پر پہنچ گیا۔

گزشتہ ہفتے دونوں بینچ مارکس نے مارچ 2023 کے بعد اپنی سب سے بڑی ہفتہ وار کمی ریکارڈ کی، تاہم جون میں وہ مسلسل دوسرے مہینے 5 فیصد سے زائد اضافے کے ساتھ ختم ہونے کے قریب ہیں۔

13 جون کو اسرائیل کی جانب سے ایران کی جوہری تنصیبات کو نشانہ بنانے سے شروع ہونے والی 12 روزہ جنگ کے دوران برینٹ کی قیمتیں 80 ڈالر فی بیرل سے تجاوز کر گئیں، لیکن امریکی صدر ڈونلڈ ٹرمپ کی جانب سے ایران-اسرائیل جنگ بندی کے اعلان کے بعد قیمتیں 67 ڈالر پر گر گئیں۔

آئی جی مارکیٹس کے تجزیہ کار ٹونی سائکمور کے مطابق، ایران-اسرائیل جنگ بندی کے بعد مارکیٹ نے قیمتوں میں شامل زیادہ تر جغرافیائی خطرے کا عنصر ختم کر دیا ہے۔

ایک علیحدہ رپورٹ کے مطابق، تیل کی قیمتوں پر مزید دباؤ اُس وقت آیا جب اوپیک پلس کے چار نمائندوں نے بتایا کہ تنظیم اگست میں یومیہ 411,000 بیرل کی پیداوار میں اضافے کا ارادہ رکھتی ہے۔ اس سے قبل مئی، جون اور جولائی میں بھی اسی حد تک پیداوار میں اضافہ کیا گیا تھا۔

اوپیک پلس کا اجلاس 6 جولائی کو متوقع ہے، اور یہ اپریل سے پیداوار میں کٹوتیوں کے خاتمے کے بعد پانچواں ماہانہ اضافہ ہوگا۔

دوسری جانب بیکر ہیوز کمپنی نے رپورٹ کیا کہ امریکہ میں فعال آئل رگز (تیل نکالنے کے آلات) کی تعداد گزشتہ ہفتے چھ کی کمی سے 432 ہو گئی، جو اکتوبر 2021 کے بعد کم ترین سطح ہے۔