گھریلو گیس صارفین کیلئے قیمتوں میں اضافہ کردیا گیا

وفاقی حکومت نے دونوں گیس کمپنیوں (ایس این جی پی ایل/ایس ایس جی سی) کے گھریلو صارفین کے لیے مقررہ چارجز میں اضافے کی منظوری دے دی ہے جس کے تحت پروٹیکٹڈ صارفین کے لیے 150 روپے اور نان پروٹیکٹڈ صارفین کے لیے 400 روپے کا ماہانہ اضافہ یکم جولائی 2025 سے نافذ العمل ہوگا۔ اس کے ساتھ ساتھ شعبہ بجلی، بڑے صنعتی صارفین اور عمومی صنعت (پروسیسنگ) کے لیے اوسطاً 10 فیصد ٹیرف میں اضافہ بھی لاگو کیا جائے گا۔

اقتصادی رابطہ کمیٹی (ای سی سی) نے پٹرولیم ڈویژن کی جانب سے پیش کردہ سمری کی منظوری دے دی جس میں مالی سال 2025-26 کے لیے نیچرل گیس کی قیمتوں کے نئے ڈھانچے کی منظوری طلب کی گئی تھی۔

ای سی سی نے توانائی شعبے کے ٹیرف میں مجوزہ رد و بدل پر غور کرتے ہوئے فیصلہ کیا کہ گھریلو صارفین کو تحفظ فراہم کرنے کے لیے گیس کی قیمتیں برقرار رکھی جائیں گی تاہم اثاثہ جات کی لاگت کی وصولی کے لیے صرف مقررہ چارجز میں دوبارہ ردوبدل کیا جائے گا۔ کمیٹی نے بلک صارفین، نیچرل گیس پر چلنے والے بجلی گھروں اور صنعتوں کے لیے گیس کی قیمت میں اوسطاً تقریباً 10 فیصد اضافے کی بھی منظوری دے دی۔

کمیٹی نے بلک صارفین کے لیے گیس ٹیرف میں اضافے کی منظوری دی، جس کے تحت نرخ 2,900 روپے فی ایم ایم بی ٹی یو سے بڑھا کر 3,075 روپے فی ایم ایم بی ٹی یو کردیے گئے۔ بجلی کے شعبے کے لیے ٹیرف 1,050 روپے سے بڑھا کر 1,313 روپے فی ایم ایم بی ٹی یو کئے گئے جبکہ جنرل انڈسٹری (پروسیسنگ) کے لیے ٹیرف 2,150 روپے سے بڑھا کر 2,350 روپے فی ایم ایم بی ٹی یو مقرر کیا گیا۔

پروٹیکٹڈ اور نان پروٹیکٹڈ گھریلو صارفین کے لیے کم از کم بل ہر کیٹیگری کے پہلے ٹیرف سلیب کے مطابق شمار کیا جائے گا۔ بجلی کے ٹیرف میں بھی ترمیم کی جائے گی، جو پی پی ایل کی گیس سپلائی برائے گڈو پاور پلانٹ اور ماری انرجیز کی گیس سپلائی برائے فاؤنڈیشن پاور پر لاگو ہوگی۔

ای سی سی کے سامنے غور کے لیے پیش کی گئی سمری کے مطابق، قیمتوں میں رد و بدل کی گنجائش صرف گھریلو شعبے کے سلیبز میں موجود ہے، جہاں بھاری بھرکم کراس سبسڈی دی جا رہی ہے جس کا تخمینہ موجودہ قیمتوں کے حساب سے سالانہ 168 ارب روپے لگایا گیا ہے۔

حکومت اس وقت آئی ایم ایف کے ریزیلینس سسٹین ایبلٹی فیسیلٹی (آر ایس ایف) پروگرام کے تحت اس بات پر کام کررہی ہے کہ کراس سبسڈی کو گھریلو صارفین کی آمدنی کی سطح کے مطابق براہ راست یا بجٹ میں شامل سبسڈی سے تبدیل کیا جائے، جو بینظیر انکم سپورٹ پروگرام (بی آئی ایس پی) کے تحت دی جائے گی۔ اصلاحاتی اقدامات کے تحت، کراس سبسڈی کو ختم کرنے کا فریم ورک جون 2026 تک تیار کیا جائے گا جو پاور ڈویژن کے موجودہ ماڈل کی طرز پر ہوگا اور اس پر عمل درآمد 2027 میں متوقع ہے۔

پیٹرولیم ڈویژن نے ایک ایسا آپشن تجویز کیا ہے جس کے تحت گیس ٹیرف کے ساتھ ساتھ مقررہ چارجز میں بھی ترمیم کی گئی ہے؛ تاہم گھریلو شعبے پر قیمتوں میں اضافے کے اثرات کو کم کرنے کے لیے بلک ڈومیسٹک، صنعتی (پروسیسنگ) اور پاور سیکٹر کے نرخوں میں بھی ترمیم کی منظوری دی گئی ہے، جو فروری 2023 سے تبدیل نہیں کیے گئے تھے۔

گیس نرخوں میں ترمیم کا اندازہ ہے کہ اس سے ایس این جی پی ایل کے 41 ارب روپے کے ریونیو خسارے کو پورا کیا جائے گا اور اس کے علاوہ ایس ایس جی سی کے لیے 31 ارب روپے کا اضافی منافع بھی پیدا ہوگا جو کہ ایس ایس جی سی کے سابقہ تقریباً 565 ارب روپے کے ریونیو خسارے کو پورا کرنے کے لیے استعمال کیا جائے گا۔

کاپی رائٹ بزنس ریکارڈر 2025