وزیرِ اعظم نے کیش لیس معیشت کے فروغ کیلئے اعلیٰ سطح کمیٹی قائم کردی

وزیرِ اعظم شہباز شریف نے بدھ کے روز ملک کو کیش لیس معیشت کی طرف تیزی سے منتقل کرنے اور ڈیجیٹل مالیاتی انفراسٹرکچر کو فروغ دینے کے لیے ایک اعلیٰ سطح کمیٹی تشکیل دینے کا اعلان کیا۔

کیش لیس معیشت کے فروغ سے متعلق جائزہ اجلاس کی صدارت کرتے ہوئے وزیرِ اعظم نے کہا کہ ڈیجیٹلائزیشن حکومت کی اولین اصلاحاتی ترجیحات میں شامل ہے، جس کا مقصد غیر رسمی معیشت کا خاتمہ اور ڈیجیٹل ادائیگیوں اور فنڈ کی منتقلی کے ذریعے شفافیت کو فروغ دینا ہے۔

انہوں نے کہاکہ کیش لیس معیشت کے فروغ کے لیے ہم پالیسی اقدامات اٹھا رہے ہیں تاکہ ڈیجیٹل ادائیگیوں اور رقوم کی منتقلی کی حوصلہ افزائی ہو۔ انہوں نے مزید بتایا کہ وفاقی بجٹ میں اس منتقلی کی حمایت کے لیے تجاویز شامل کی گئی ہیں۔

وزارتِ خزانہ اور وزارتِ آئی ٹی کے حکام نے اجلاس کو ڈیجیٹل ٹرانسفارمیشن سے متعلق پیش رفت پر بریفنگ دی، جس میں تاجروں کو ڈیجیٹل ادائیگیوں اپنانے کی ہدایات اور عوامی سطح پر ڈیجیٹل فنانس کو فروغ دینے کی کوششیں شامل تھیں۔ تیز رفتار عمل درآمد کے لیے وزیرِ اعظم نے ایک اعلیٰ سطح کمیٹی تشکیل دینے کا اعلان کیا، جس کی صدارت وہ خود کریں گے۔ یہ کمیٹی ہر ہفتے اجلاس کرے گی تاکہ ڈیجیٹلائزیشن اور مالیاتی شفافیت سے متعلق پیش رفت کا جائزہ لیا جا سکے۔

وزیرِ اعظم نے رمضان المبارک کے دوران مستحقین کو امداد کی تقسیم کے لیے ڈیجیٹل والٹس کے کامیاب استعمال کا حوالہ دیا۔ ان کا کہنا تھا کہ مستحقین کو ان کا حق شفاف انداز میں اور بغیر کسی انسانی مداخلت کے ملا۔

انہوں نے ملک کے معاشی اشاریوں میں بہتری کی جانب اشارہ کرتے ہوئے کہا کہ مہنگائی میں کمی آئی ہے اور ترسیلات زر میں اضافہ ہوا ہے۔ انہوں نے مزید کہا کہ اسٹاک مارکیٹ میں تیزی حکومت کی معاشی پالیسی پر سرمایہ کاروں کے اعتماد کی عکاسی کرتی ہے۔

وزیراعظم نے کہا کہ اللہ کے فضل سے ہماری معاشی ٹیم کی کوششیں رنگ لا رہی ہیں۔

اجلاس میں وفاقی وزیرِ خزانہ محمد اورنگزیب، وزیرِ منصوبہ بندی احد خان چیمہ، وزیرِ مملکت برائے انفارمیشن ٹیکنالوجی شیزا فاطمہ خواجہ، ایف بی آر کے چیئرمین راشد محمود لنگڑیال اور دیگر اعلیٰ حکام نے شرکت کی۔

کاپی رائٹ بزنس ریکارڈر، 2025