بجٹ 2025-26 ”دھوکہ دہی پر مبنی“ ہے، کے سی سی آئی نے خطرے کی گھنٹی بجا دی

چیئرمین بزنس مین گروپ (بی ایم جی)، زبیر موتی والا نے وفاقی بجٹ 2025-26 کو ”چالاکی سے چھپایا گیا بجٹ“ قرار دیتے ہوئے اس میں غیرحقیقی اہداف اور کاروباری برادری و عام عوام کے لیے کسی بھی حقیقی ریلیف کی عدم موجودگی پر سخت تحفظات کا اظہار کیا ہے۔

ایک پریس بیان کے مطابق انہوں نے کہا کہ اگرچہ بجٹ میں ڈیجیٹلائزیشن اور کیش لیس معیشت کو فروغ دینے سے متعلق کئی اعلانات شامل ہیں، لیکن یہ اقدامات برآمدات میں اضافے یا صنعتی ترقی کو فروغ دینے کے لیے ناکافی ہیں — جو کہ پائیدار معاشی ترقی کے لیے نہایت اہم ہیں۔

وزیر خزانہ محمد اورنگزیب نے منگل کے روز ”مسابقتی معیشت“ کے لیے وفاقی بجٹ 2025-26 پیش کیا، جس میں آئندہ مالی سال کے لیے 4.2 فیصد کی متوازن شرح نمو کا ہدف مقرر کیا گیا ہے، جبکہ رواں مالی سال 2024-25 میں یہ ہدف 2.7 فیصد رہنے کا امکان ہے۔

کراچی چیمبر آف کامرس اینڈ انڈسٹری (کے سی سی آئی) میں پریس کانفرنس سے خطاب کرتے ہوئے زبیر موتی والا نے حکومت پر تنقید کی کہ اس نے پچھلے مالی سال کی خراب معاشی کارکردگی، جس میں تمام بڑے اہداف، بشمول جی ڈی پی گروتھ اور مالیاتی استحکام ، حاصل نہ ہونے کے باوجود، غیر حقیقت پسندانہ اہداف مقرر کیے ہیں۔

انہوں نے سوال اٹھایا کہ جب معیشت کمزور، مہنگائی بلند اور آئی ایم ایف کی سخت شرائط غالب ہیں، تو حکومت نے یہ اہداف کیسے حاصل کرنے ہیں؟ اور ان کے پیچھے کوئی عملی حکمتِ عملی کیوں پیش نہیں کی گئی؟

چیئرمین بزنس مین گروپ (بی ایم جی) زبیر موتی والا نے کہا ہے کہ حکومت کی ٹیکس وصولی کا ہدف حاصل کرنے کی حکمت عملی زیادہ تر انہی لوگوں سے مزید ریونیو نکالنے پر مبنی ہے جو پہلے ہی نظام کا حصہ ہیں، بجائے اس کے کہ ٹیکس نیٹ کو وسعت دی جائے۔

وہ کراچی چیمبر آف کامرس اینڈ انڈسٹری (کے سی سی آئی) میں پریس کانفرنس سے خطاب کر رہے تھے، جہاں ان کے ہمراہ بی ایم جی کے وائس چیئرمین انجم نثار، صدر کے سی سی آئی محمد جاوید بلوانی، سینئر نائب صدر ضیاء العارفین، چیئرمین پالیسی ریسرچ اینڈ ایڈوائزری کونسل یونس ڈاگا، سابق صدور جنید اسماعیل مکڈا، محمد ادریس، افتخار احمد شیخ، اور کے سی سی آئی کی منیجنگ کمیٹی کے ارکان موجود تھے۔

زبیر موتی والا نے خدشہ ظاہر کیا کہ بجائے اس کے کہ حکومت غیر رجسٹرڈ اور غیر دستاویزی شعبوں کو نظام میں لانے کے لیے اصلاحات کرے، بجٹ میں ٹیکس حکام کو مزید اختیارات دے دیے گئے ہیں، جو پہلے سے رجسٹرڈ کاروباروں پر اضافی بوجھ ڈالیں گے اور معاشی سرگرمیوں کی حوصلہ شکنی کا باعث بنیں گے۔

انہوں نے خبردار کیا کہ رسمی شعبے (فارمل سیکٹر) کو مسلسل نچوڑنے کی یہ پالیسی معیشت کے پھیلاؤ کے بجائے اس کے سکڑنے کا سبب بن سکتی ہے۔

چیئرمین بی ایم جی نے اس بات پر افسوس کا اظہار کیا کہ بجٹ میں برآمدات یا صنعتی ترقی کے فروغ کے لیے کوئی واضح پالیسی سمت موجود نہیں۔ انہوں نے کہا کہ حکومت بظاہر ایک درآمدی ماڈل کی طرف بڑھ رہی ہے، اور خاص طور پر توانائی کے زیادہ استعمال والے شعبوں جیسے کہ ٹیکسٹائل میں کاروباری لاگت کم کرنے کی ضرورت کو نظر انداز کر رہی ہے۔

زبیر موتی والا نے کہا کہ بجٹ میں گیس کی بلند قیمتوں کے مسئلے کو حل کرنے کے لیے کوئی اعلان نہیں کیا گیا، حالانکہ یہی عنصر پاکستانی مصنوعات کو عالمی منڈیوں میں غیرمقابل بناتا جا رہا ہے۔ ان کا کہنا تھا کہ جب تک گیس کے نرخوں میں کمی یا شرح سود کے ماحول میں نرمی نہیں آتی، حکومت کے ترقیاتی اہداف قابلِ حصول نہیں ہوں گے۔

انہوں نے برآمدی ٹیکسٹائل سیکٹر کو دی گئی انتہائی معمولی مدد پر بھی شدید تنقید کی، جسے انہوں نے ملکی معیشت کی ریڑھ کی ہڈی قرار دیا۔ ان کا کہنا تھا کہ اگر صنعتی صارفین کے لیے گیس کی قیمتوں میں مؤثر کمی کی جاتی تو اس کے مثبت اثرات مرتب ہو سکتے تھے، مگر افسوس کہ اس ضمن میں کوئی اقدام نہیں کیا گیا۔

انہوں نے پبلک سیکٹر ڈیولپمنٹ پروگرام (پی ایس ڈی پی) کے لیے صرف 1,000 ارب روپے مختص کیے جانے کو بھی ناکافی قرار دیا، خاص طور پر موجودہ خراب انفرااسٹرکچر کی حالت کو دیکھتے ہوئے۔

اگرچہ انہوں نے تسلیم کیا کہ بجٹ سخت آئی ایم ایف شرائط کے تحت تیار کیا گیا، مگر ان کا کہنا تھا کہ “یہ بجٹ تکنیکی طور پر تو مکمل ہو سکتا ہے، لیکن پاکستان کے صنعتی شعبے یا عوام کی فوری ضروریات کا جواب نہیں دیتا۔

زبیر موتی والا نے اس بجٹ کو ایسا قرار دیا جو صرف بیرونی قرض دہندگان کو مطمئن کرنے کے لیے تیار کیا گیا ہے، مگر مقامی کاروباروں اور عام شہریوں کے لیے اس میں کوئی عملی امید موجود نہیں۔

صدر کراچی چیمبر آف کامرس اینڈ انڈسٹری (کے سی سی آئی)، محمد جاوید بلوانی نے وفاقی بجٹ کو یکسر مسترد کرتے ہوئے کہا ہے کہ یہ بجٹ نہ صنعتی شعبے کو کوئی حقیقی ریلیف دیتا ہے اور نہ ہی عام آدمی کے مسائل کا حل پیش کرتا ہے۔

انہوں نے کہا کہ حکومت کی مہنگائی میں کمی کے دعوے زمینی حقائق سے میل نہیں کھاتے، کیونکہ گھریلو صارفین کے لیے بجلی کے بل ناقابل برداشت ہو چکے ہیں اور روزمرہ اشیائے ضروریہ عوام کی پہنچ سے باہر ہو گئی ہیں۔

جاوید بلوانی نے کاروباری لاگت میں اضافے کے اہم عوامل، بجلی کے نرخ اور سود کی بلند شرح، پر قابو پانے کے لیے کسی مؤثر اقدام کی عدم موجودگی پر شدید تشویش کا اظہار کیا۔

انہوں نے معیشت کو چلانے کے لیے بیرون ملک مقیم پاکستانیوں کی ترسیلات اور آئی ایم ایف پروگرامز پر انحصار کو خطرناک قرار دیتے ہوئے کہا کہ یہ ایک ”غیر مستحکم اور قلیل مدتی حکمت عملی“ ہے۔

صدر کے سی سی آئی نے کراچی کے لیے انتہائی اہم انفرااسٹرکچر منصوبوں، جیسے کہ کے فور کے لیے ناکافی فنڈز کی فراہمی کو حکومت کی کراچی سے بے رخی اور اس کے قومی معیشت میں کلیدی کردار کو نظر انداز کرنے کی علامت قرار دیا۔

ان کا مزید کہنا تھا کہ بزنس کمیونٹی کی بارہا درخواستوں کے باوجود نہ تو ٹیکس نیٹ کو وسعت دینے کے لیے کوئی مؤثر قدم اٹھایا گیا اور نہ ہی بنیادی معاشی اصلاحات کی جانب کوئی پیش رفت ہوئی — جو کہ ملک کے دیرپا معاشی استحکام کے لیے ناگزیر ہیں۔