اٹک سیمنٹ: الفا سیمنٹ کا اکثریتی حصص حاصل کرنے کا ارادہ، بیسٹ وے دوڑ سے باہر

الفا سیمنٹ کمپنی لمیٹڈ، جو کراچی میں قائم ایک کمپنی ہے، نے اٹک سیمنٹ کمپنی لمیٹڈ (اے سی پی ایل) میں اکثریتی حصص اور کنٹرول حاصل کرنے کا ارادہ ظاہر کیا ہے۔

یہ پیش رفت ایسے وقت میں ہوئی ہے جب اٹک سیمنٹ کی پیرنٹ کمپنی فیراؤن انویسٹمنٹ گروپ لمیٹڈ نے اپنی حصص فروخت کرنے کی خواہش ظاہر کی ہے۔

الفا سیمنٹ کی جانب سے عارف حبیب لمیٹڈ (جو کہ اس سودے میں ”منیجر ٹو دی آفر“ مقرر کی گئی ہے) کے ذریعے جمع کروائی گئی پبلک اناؤنسمنٹ آف انٹینشن (پی اے آئی) کے مطابق، الفا سیمنٹ کا ارادہ ہے کہ وہ 84.06 فیصد حصص یعنی 1 کروڑ 15 لاکھ 50 ہزار شیئرز اور کمپنی کا کنٹرول حاصل کرے۔

مزید برآں، الفا سیمنٹ نے عندیہ دیا ہے کہ اگر ضرورت پیش آئی تو وہ مزید 7.97 فیصد (یعنی 10 لاکھ 95 ہزار شیئرز) بھی عوامی پیشکش کے ذریعے حاصل کرنے کی خواہش رکھتی ہے۔

پی اے آئی کے مطابق، الفا سیمنٹ کا بنیادی کاروبار ہر قسم کے سیمنٹ اور اس سے منسلک مصنوعات کی پیداوار، تیاری، پروسیسنگ اور فروخت پر مشتمل ہے۔

بیسٹ وے کی دوڑ سے دستبرداری

ایک علیحدہ اعلامیے میں، پاکستان کی بڑی سیمنٹ کمپنیوں میں سے ایک بیسٹ وے سیمنٹ (بی ڈبلیو سی ایل) نے تصدیق کی کہ اس نے اسٹینڈرڈ چارٹرڈ بینک (ایس سی بی) کو، جو کہ فیراؤن انویسٹمنٹ گروپ کی جانب سے یہ فروخت کا عمل سنبھال رہا ہے، ایک نان بائنڈنگ آفر دی تھی تاکہ وہ اٹک سیمنٹ میں اکثریتی حصص حاصل کر سکے۔

اعلامیے کے مطابق: یہ پی ایس ایکس کے آپ کے خط نمبر پی ایس ایکس/جی ای این-1107 مورخہ 2 جون 2025 اور 30 مئی 2025 کو بزنس ریکارڈر میں شائع ہونے والے مضمون کے حوالے سے ہے، جس میں فیراؤن انویسٹمنٹ گروپ لمیٹڈ کی جانب سے اٹک سیمنٹ پاکستان لمیٹڈ کے حصص کی فروخت کا ذکر کیا گیا ہے، اور بیسٹ وے سیمنٹ کو ممکنہ خریداروں میں شامل بتایا گیا ہے۔

کمپنی کے مطابق، اس نے اس مجوزہ فروخت کے موقع کا جائزہ لیا اور ایک ابتدائی اور غیر حتمی (نان بائنڈنگ) آفر پیش کی تاکہ اپنی دلچسپی ظاہر کی جا سکے۔

تاہم بعد میں بیسٹ وے سیمنٹ کو مطلع کیا گیا کہ اسے اس فروخت کے دوسرے مرحلے میں شامل نہیں کیا جا رہا۔

یاد رہے کہ اٹک سیمنٹ پاکستان لمیٹڈ 14 اکتوبر 1981 کو پاکستان میں بطور پبلک لمیٹڈ کمپنی قائم ہوئی۔ یہ کمپنی فیراؤن انویسٹمنٹ گروپ لمیٹڈ ہولڈنگ ایس اے ایل، لبنان کی ذیلی کمپنی ہے۔

کمپنی کا بنیادی کاروبار سیمنٹ کی تیاری اور فروخت ہے۔