قوی نصیر نے ہیلیون پاکستان کے سی سی او کا عہدہ سنبھال لیا

قوی نصیر نے ہیلیون پاکستان لمیٹڈ جو کہ ایک کنزیومر ہیلتھ کیئر کمپنی ہے کے چیف ایگزیکٹو آفیسر (سی ای او) کے طور پر ذمہ داریاں سنبھال لی ہیں۔

لسٹڈ کمپنی نے پیر کو پاکستان اسٹاک ایکسچینج کو ایک نوٹس کے ذریعے اس پیش رفت سے آگاہ کیا۔

کمپنی کے 17 اپریل 2025 کے خط کے تسلسل میں مطلع کیا جاتا ہے کہ فرحان محمد ہارون نے ہیلیون پاکستان لمیٹڈ کے چیف ایگزیکٹو آفیسر (سی ای او) اور ایگزیکٹو ڈائریکٹر کے عہدوں سے یکم جون 2025 سے استعفیٰ دے دیا ہے۔

نوٹس کے مطابق قوی نصیر کو یکم جون 2025 سے ہیلیون پاکستان لمیٹڈ کا چیف ایگزیکٹو آفیسر اور ایگزیکٹو ڈائریکٹر مقرر کر دیا گیا ہے۔

یاد رہے کہ اپریل میں ہیلیون پاکستان کے بورڈ آف ڈائریکٹرز نے قوی نصیر کو جو 28 اپریل 2025 کو کمپنی میں شامل ہوئے، چیف ایگزیکٹو آفیسر کے طور پر تعینات کرنے کا فیصلہ کیا تھا۔

کمپنی نے اس موقع پر کہا تھا کہ قوی نصیر ایک پرعزم اور کامیاب کاروباری رہنما ہیں جنہیں صارفین کی اشیاء کی صنعت میں ترقی، جدت اور مثبت تبدیلیوں کے فروغ کا وسیع تجربہ حاصل ہے۔

مارچ میں ہیلیون پاکستان لمیٹڈ، جو پہلے گلیکسو اسمتھ کلائن کنزیومر ہیلتھ کیئر پاکستان لمیٹڈ کے نام سے جانی جاتی تھی، نے اعلان کیا تھا کہ اس نے جامشورو میں واقع اپنی پیداواری سہولت سے مشہور ملٹی وٹامن برانڈ سینٹرم کو کامیابی سے کینیا برآمد کیا ہے۔

کمپنی کی ویب سائٹ پر دستیاب معلومات کے مطابق ہیلیون کی عالمی سطح پر موجودگی ہے، جس کی تجارتی سرگرمیاں 150 سے زائد ممالک میں جاری ہیں، 36 ممالک میں 86 پیداواری یونٹس کا نیٹ ورک موجود ہے، جبکہ تحقیق و ترقی کے بڑے مراکز برطانیہ، امریکہ، اسپین، بیلجیم اور چین میں قائم ہیں۔