نشاط ہوٹلز اینڈ پراپرٹیز رفحان میز میں اکثریتی حصص خریدنے کی خواہشمند

نشاط گروپ کا حصہ، نشاط ہوٹلز اینڈ پراپرٹیز لمیٹڈ نے پاکستان کی بڑی زرعی صنعتوں میں سے ایک، رفحان میز پروڈکٹس کمپنی لمیٹڈ (آر ایم پی ایل) کے 75.69 فیصد حصص حاصل کرنے کی خواہش کا اظہار کیا ہے۔

یہ پیش رفت رفحان میز نے جمعرات کے روز پاکستان اسٹاک ایکسچینج (پی ایس ایکس) کو ایک نوٹس کے ذریعے بتائی۔

نوٹس میں کہا گیا کہ یہ اطلاع دی جاتی ہے کہ رفحان میز پروڈکٹس کمپنی لمیٹڈ کو نشاط ہوٹلز اینڈ پراپرٹیز لمیٹڈ کی جانب سے ٹارگٹ کمپنی کے 6,991,052 ووٹنگ شیئرز (جو ادا شدہ سرمایہ کا 75.69 فیصد بنتے ہیں) حاصل کرنے کا پُختہ ارادہ موصول ہوا ہے، جو سیکیورٹیز ایکٹ 2015 کی دفعہ 111 کے تحت مقررہ حد سے زیادہ ہے۔

رفحان میز کے مطابق، اس ارادے کی اطلاع 14 مئی 2025 کو کمپنی کے بورڈ آف ڈائریکٹرز کو دی گئی ہے۔

نشاط ہوٹلز اینڈ پراپرٹیز لمیٹڈ بنیادی طور پر ’نشاط ایمپوریم‘ اور ’نشاط ہوٹل‘ کے نام سے شاپنگ مال، ہوٹل اور بینکوئٹ ہالز کی ملکیت، انتظام اور آپریٹنگ کا کام کرتا ہے۔ کمپنی ’نشاط ریزیڈنسیز‘ کے نام سے رئیل اسٹیٹ کے شعبے میں بھی سرگرم ہے، جس میں زیادہ تر رہائشی اپارٹمنٹس شامل ہیں۔

اس سے قبل رواں ماہ، امریکہ میں قائم فوڈ اینڈ بیوریج اجزاء فراہم کرنے والی کمپنی، انگریڈین انکارپوریٹڈ نے اپنے آر ایم پی ایل میں حصص کی فروخت کے لیے مختلف آفرز کا جائزہ لینے کا اعلان کیا تھا۔

اس وقت آر ایم پی ایل نے پی ایس ایکس کو بتایا تھا کہ انگریڈین انکارپوریٹڈ نے مطلع کیا ہے کہ انہیں رفحان میز پروڈکٹس کمپنی لمیٹڈ میں اپنے ایکویٹی حصص کے ممکنہ فروخت کے حوالے سے متعدد نان بائنڈنگ آفرز موصول ہوئی ہیں، جن کا وہ جائزہ لے رہے ہیں۔“

چند روز قبل، چراٹ سیمنٹ اور شیرازی انویسٹمنٹس نے بھی کمپنی میں اکثریتی حصص خریدنے کی خواہش ظاہر کی تھی۔

رفحان میز نے 1953 میں پاکستان میں مکئی کو ریفائن کرنے والی صنعت کے طور پر کام کا آغاز کیا۔ وقت کے ساتھ، یہ کمپنی ملک کی سب سے بڑی زرعی صنعتوں میں سے ایک بن گئی ہے۔

کمپنی مکئی کو بطور خام مال استعمال کرتے ہوئے متعدد فوڈ اجزاء اور صنعتی مصنوعات تیار کرتی ہے، جن میں صنعتی اسٹارچ، لیکوئڈ گلوکوز، ڈیکسٹروز، ڈیکسٹرن اور گلوٹن میلز شامل ہیں۔