حکومت پنجاب نے خطے میں بڑھتی ہوئی کشیدگی اور سرحد پار سے حالیہ ڈرون حملوں کے پیش نظر صوبے بھر کے تمام سرکاری اور نجی تعلیمی اداروں کو اتوار 11 مئی تک بند رکھنے کا اعلان کیا ہے۔
محکمہ اسکول ایجوکیشن پنجاب کی جانب سے جاری نوٹیفکیشن کے مطابق تمام سرکاری و نجی اسکول جمعہ 9 مئی اور ہفتہ 10 مئی 2025 کو بند رہیں گے۔
تعلیمی سرگرمیاں پیر 12 مئی سے دوبارہ شروع کی جائیں گی۔
اعلامیے کے مطاق تاہم بین الاقوامی امتحانی اداروں یعنی او لیول/ اے لیول کی جانب سے طے شدہ امتحانات شیڈول کے مطابق جاری رہیں گے۔
صوبائی وزیر تعلیم رانا سکندر حیات نے بھی دو دن کے تعلیمی اداروں کی بندش کی تصدیق کی جس کی وجہ انہوں نے قومی سلامتی کے خدشات کو قرار دیا۔
اس سے قبل آئی ایس پی آر نے بتایا کہ پاکستان نے گزشتہ چند دنوں میں کم از کم 25 بھارتی ڈرون مار گرائے ہیں جن کی شناخت اسرائیلی ساختہ ہاروپ لوئٹرنگ مونیوشنز کے طور پر کی گئی ہے۔ ان ڈرونز کو ”سافٹ کل“ (الیکٹرانک مداخلت) اور ”ہارڈ کل“ (براہِ راست فائرنگ) کی تکنیکس سے نشانہ بنایا گیا۔
گرائے گئے ڈرونز کا ملبہ ملک کے کئی علاقوں سے برآمد ہوا جن میں لاہور، راولپنڈی، گوجرانوالہ، چکوال، اٹک، بہاولپور، سانگلہ ہل، میانو، چھور، اور کراچی کے نزدیک کے علاقے شامل ہیں۔
پریس بریفنگ کے دوران ڈی جی آئی ایس پی آر لیفٹیننٹ جنرل احمد شریف چوہدری نے ان ڈرون حملوں کو ”بزدلانہ اور اشتعال انگیز“ قرار دیا اور بھارت پر الزام عائد کیا کہ وہ 6 اور 7 مئی کو پاکستان کی جوابی فضائی کارروائیوں کے بعد ”مایوسی اور گھبراہٹ“ میں یہ قدم اٹھا رہا ہے۔
انہوں نے دعویٰ کیا کہ پاکستان کا جواب بالکل درست تھا اور اس میں صرف بھارتی فوجی اثاثوں کو نشانہ بنایا گیا جس میں تین رافیل لڑاکا طیاروں سمیت پانچ بھارتی طیارے تباہ ہوئے۔ پاکستانی طیاروں یا تنصیبات کو کسی قسم کے نقصان کی اطلاع نہیں ہے۔
انہوں نے کہا کہ دشمن براہ راست تصادم سے بچنے کے لئے بغیر پائلٹ کے نظام کے پیچھے چھپ رہا ہے، یہ کمزوری کی علامت ہے، طاقت کی نہیں۔
بھارت کی جانب سے جارحیت کے پیش نظر حکام صورتحال پر نظر رکھے ہوئے ہیں اور آنے والے دنوں میں عوامی تحفظ کے حوالے سے مزید فیصلے متوقع ہیں۔
Comments
Comments are closed.