قیمتی دھاتوں اور جواہرات کو ریگولیٹ کرنے والا ایس آر او عارضی طور پر معطل

حکومت نے ایس آر او 760(I)/2013 جو قیمتی دھاتوں، زیورات اور پتھروں کی درآمد و برآمد کا آرڈر، 2013 ہے، کے نفاذ کو 60 دن کیلئے عارضی طور پر مؤخر کردیا ہے۔

نوٹس میں کہا گیا کہ وفاقی حکومت ایس آر او 760(I)/2013 جو ’قیمتی دھاتوں، زیورات اور قیمتی پتھروں کی درآمد اور برآمد کا آرڈر، 2013‘ ہے کو فوری طور پر 60 دن کے لیے معطل کرنے کا اعلان کرتی ہے۔

ایس آر او 760(I)/2013 وہ قواعد و ضوابط اور شرائط مرتب کرتا ہے جو پاکستان میں قیمتی دھاتوں (جیسے سونا، چاندی، پلاٹینم)، پتھروں اور زیورات کی درآمد و برآمد سے وابستہ کاروبار پر لاگو ہوتی ہیں۔

دوسری جانب، قیمتی دھاتوں، پتھروں اور ان دھاتوں اور پتھروں کے امتزاج سے بنے زیورات کی درآمد یا برآمد کو انٹرسٹمنٹ اسکیم اور سیلف کنسائمنٹ اسکیم کے تحت اجازت دی جائے گی۔

انٹرسٹمنٹ اسکیم کے تحت زیورات اور ان سے بنی اشیاء کی برآمد کی اجازت دی جاتی ہے، جو غیر ملکی خریدار کی طرف سے جزوی پیشگی ادائیگی کے طور پر فراہم کردہ درآمد شدہ قیمتی دھاتوں کے بدلے کی جاتی ہے، جس میں وہ قیمتی دھاتیں شامل ہیں جو زیورات کی تیاری میں استعمال ہوں گی، اس میں ضائع ہونے والی مقدار بھی شامل ہے۔

اس اسکیم کے تحت درآمد کی جانے والی قیمتی دھاتوں کی مقدار کو ایک متواتر بنیاد پر 25 کلو گرام تک محدود کیا جائے گا۔

اس اسکیم کے تحت درآمد کی جانے والی قیمتی دھاتیں نہ تو مقامی مارکیٹ میں فروخت کی جا سکتی ہیں اور نہ ہی کسی اور مقصد کے لیے استعمال کی جا سکتی ہیں، سوائے اس کے کہ ان سے زیورات تیار کر کے معاہدے کی شرائط کے مطابق سپلائر کو برآمد کیا جائے۔