پاکستان اور متحدہ عرب امارات کے درمیان تجارتی اور ثقافتی تعلقات کو فروغ دینے کیلئے معاہدے پر دستخط

پاکستان اور متحدہ عرب امارات (یو اے ای) نے پیر کے روز ثقافت، تجارت اور قونصلر امور سمیت مختلف شعبوں میں تعاون کو فروغ دینے کے لیے متعدد مفاہمتی یادداشتوں (ایم او یوز) پر دستخط کیے۔

دفتر خارجہ کے مطابق، دونوں ممالک نے اقتصادی تعلقات کو مزید مضبوط بنانے اور پاکستان و یو اے ای کی کاروباری برادریوں کے درمیان روابط بڑھانے کے لیے یو اے ای-پاکستان جوائنٹ بزنس کونسل (جے بی سی) کے قیام پر بھی اتفاق کیا ہے۔

یہ معاہدے پاکستان کے نائب وزیراعظم و وزیر خارجہ اسحاق ڈار اور یو اے ای کے نائب وزیراعظم و وزیر خارجہ شیخ عبداللہ بن زاید النہیان کے درمیان اعلیٰ سطح ملاقات کے دوران طے پائے۔

وفود کی سطح پر مذاکرات کے بعد دونوں معزز شخصیات نے ثقافتی تعاون اور قونصلر امور سے متعلق مشترکہ کمیٹی کے قیام پر ایم او یوز پر دستخط کیے۔ اسی طرح یو اے ای-پاکستان جوائنٹ بزنس کونسل کے قیام کے حوالے سے مفاہمتی یادداشت کا تبادلہ بھی دونوں وزرائے خارجہ کی موجودگی میں ہوا۔

دفتر خارجہ کے ترجمان کے مطابق، ان معاہدوں کا مقصد دونوں ممالک کے عوام اور کاروباری طبقے کے درمیان تعلقات کو مضبوط بنانا ہے۔ ایم او یوز سے ثقافت، تجارت اور قونصلر امور سمیت کئی شعبوں میں دوطرفہ تعاون کو فروغ ملے گا۔

اس موقع پر اسحاق ڈار نے وزارت خارجہ میں یو اے ای کے نائب وزیراعظم کا خیرمقدم کرتے ہوئے کہا کہ پاکستان اور یو اے ای کے درمیان دہائیوں پر محیط برادرانہ تعلقات قائم ہیں جو باہمی محبت، عقیدت اور مشترکہ وابستگی پر مبنی ہیں۔ انہوں نے کہا کہ دونوں ممالک عوام کی فلاح و بہبود کے لیے مل کر کام کر رہے ہیں۔

یو اے ای کے وزیر خارجہ نے پاکستان آمد پر مسرت کا اظہار کرتے ہوئے کہا کہ یہ ملک نہ صرف یو اے ای بلکہ ان کے دل کے بھی بہت قریب ہے۔ انہوں نے پاکستان کی میزبانی کو سراہا اور کہا کہ دونوں ممالک کی قیادت موجودہ تعلقات کو مزید گہرا بنانے کی خواہاں ہے۔

دفتر خارجہ کے بیان کے مطابق دونوں وزرائے خارجہ کے درمیان خوشگوار ماحول میں تفصیلی اور جامع مذاکرات ہوئے، جن میں دوطرفہ تعلقات کے علاوہ خطے اور عالمی سطح کے مشترکہ دلچسپی کے امور پر بھی تبادلہ خیال کیا گیا۔

شیخ عبداللہ بن زاید النہیان اتوار کی شام پاکستان کے دو روزہ سرکاری دورے پر پہنچے۔ یہ اعلیٰ سطح دورہ پاکستان اور یو اے ای کے گہرے برادرانہ تعلقات کی عکاسی کرتا ہے اور باہمی دلچسپی کے تمام شعبوں میں دوطرفہ تعاون کو فروغ دینے کے مشترکہ عزم کو ظاہر کرتا ہے۔

اس دورے کے دوران پاکستانی قیادت کے ساتھ تجارت و سرمایہ کاری، توانائی کے شعبے میں تعاون، علاقائی سلامتی اور عوامی روابط کے فروغ پر بھی بات چیت ہوئی۔

یہ دورہ دونوں ممالک کے درمیان 21 فروری 2025 کو ابوظہبی میں ہونے والی ملاقات کے بعد دوطرفہ تعلقات کو مزید وسعت دینے کا موقع بھی فراہم کرتا ہے۔

کاپی رائٹ بزنس ریکارڈر، 2025