پنجاب حکومت مصنوعی مہنگائی کے خاتمے کیلئے پرعزم

وزیراعلیٰ پنجاب مریم نواز شریف نے کہا ہے کہ پنجاب حکومت مصنوعی مہنگائی پر قابو پانے کے لیے بھرپور کوششیں کررہی ہے۔

وزیراعلیٰ پنجاب نے کہا کہ وزیراعظم شہبازشریف کی محنت کے ثمرات تیزی سے سامنے آرہے ہیں ۔ آج ملک کے دیوالیہ ہونے کی بات نہیں ہورہی بلکہ اسٹاک ایکسچینج کے نئے ریکارڈز قائم ہونے کی خبریں ہیں۔ انہوں نے مزید کہا کہ مہنگائی بڑھنے کی شرح کم ترین سطح پر آئی ہے، پہلے کبھی مہنگائی کم نہیں ہوئی، آٹا سستا نہیں ہوا، بجلی کے نرخ کم نہیں ہوئے، لیکن مسلم لیگ (ن) کی حکومت نے اللہ کے فضل سے یہ سب ممکن بنایا ہے۔

انہوں نے کہا کہ انہیں پاکستان اور پنجاب کی پہلی انوائرمنٹ پروٹیکشن فورس کے قیام پر فخر ہے۔

انوائرمنٹ پروٹیکشن فورس کی پاسنگ آؤٹ تقریب سے خطاب کرتے ہوئے مریم نواز نے کہا کہ انوائرنمنٹ پروٹیکشن فورس میں سکھ نوجوان لڑکیوں کو دیکھ کر مجھے بے حد خوشی ہوئی ہے،میں انوائرنمنٹ پروٹیکشن فورس کے تمام اہلکاروں کو سلام پیش کرتی ہوں۔ انہوں نے کہا کہ آپ نے وردی پہن لی ہے اور اب آپ پر ملک کی حفاظت کی ذمہ داری ہے، چاہے وہ ماحولیاتی سرحدوں کی ہی کیوں نہ ہو، یہ ایک بہت بڑی ذمے داری ہے۔

انہوں نے کہا کہ پنجاب کو سرسبز و شاداب بنانے کے لئے لاکھوں درخت لگائے جاچکے ہیں اور مزید درخت لگائے جا رہے ہیں۔ ہر کوئی جانتا ہے کہ حکومت سنبھالنے سے پہلے حالات کتنے خراب تھے۔ گزشتہ روز حکومت میں نہ ملک کی پرواہ کی گئی اور نہ قوم کی، لیکن اب ملک کی فکر کرنے والے لوگ اقتدار میں آچکے ہیں تاکہ ملک کو درست سمت میں چلایا جا سکے۔ پچھلی حکومت چار سال اقتدار میں رہی لیکن بدقسمتی سے ملک کی ترقی کے لیے کچھ نہ کیا، صرف کرپشن میں ملوث رہے۔

وزیراعلیٰ نے مزید کہا کہ اگر وہ لوگ جنہوں نے چار سال اقتدار میں گزارے، ملک کی ترقی کے لیے محنت کرتے تو آج پاکستان اس قدر بدحالی کا شکار نہ ہوتا۔

انہوں نے کہا کہ پنجاب میں روٹی کی قیمت 25 روپے سے کم ہو کر 12 روپے ہو گئی ہے۔ جب آٹا سستا ہو جاتا ہے تو کوئی بھوکا نہیں سوتا۔ رمضان المبارک میں پنجاب حکومت نے مستحقین کو ان کی دہلیز پر چیک دیئے اور لوگوں کو قطاروں میں کھڑا نہیں ہونا پڑا۔ پنجاب بھر کے شہروں اور دیہاتوں میں صفائی کا یکساں نظام متعارف کرایا جا رہا ہے۔ صفائی کرنے والی گاڑیاں ہر جگہ نظر آتی ہیں۔ میں اللہ تعالیٰ کی تہہ دل سے شکر گزار ہوں کہ اس نے ہمیں کم وقت میں موسمیاتی تبدیلی کے خطرات اور چیلنجوں کا مقابلہ کرنے کی توفیق دی۔

وزیراعلیٰ پنجاب نے کہا کہ گزشتہ چند سال سے اسموگ کی وجہ سے بزرگ، بچے اور دیگر سب بیمار ہو جاتے تھے۔ اسموگ کی وجہ سے اسکولوں کو بند کرنا پڑا اور اسپتال مریضوں سے بھرگئے۔ ہوا کو سانس لینے کے قابل بنانا بھی ہمارے لئے ایک بڑا خواب اور چیلنج تھا۔ انسانی صحت پر فضائی آلودگی کے مضر اثرات کا مقابلہ کرنے کے لئے ایک جامع ماحولیاتی پالیسی تیار کی گئی اور اسے ایک خصوصی اسکواڈ کی تشکیل کی شکل میں بھی نافذ کیا گیا۔

انہوں نے مزید کہا کہ دیگر صوبے زیرو پلاسٹک پالیسی کے اسی ماڈل پر عملدرآمد کر رہے ہیں جو پنجاب حکومت نے شروع کیا ہے ۔ پنجاب تیزی سے زیرو پلاسٹک پالیسی کی جانب بڑھ رہا ہے۔ سینئر صوبائی وزیر مریم اورنگزیب، سیکرٹری ماحولیات راجہ جہانگیر انور اور پوری ٹیم نے بہت محنت کی ہے۔ امید ہے کہ انوائرنمنٹ پروٹیکشن فورس مزید محنت کرے گی تاکہ پنجاب ایک بار پھر صاف ستھرا اور سرسبز و شاداب ہو سکے۔ ستھرا پنجاب پروگرام کے تحت صوبے کے ہر علاقے میں صفائی ستھرائی کو یقینی بنایا جا رہا ہے۔

انہوں نے مزید کہا کہ ہماری حکومت نے محکمہ ماحولیات کو نئی موٹر سائیکلیں، گاڑیاں، ڈرون اور ایک نیا اسکواڈ فراہم کیا ہے۔ محکمہ ماحولیات میں بھی یہی صورتحال تھی جو پچھلی حکومت کے دوران بھی برقرار رہی۔ آج ملک و قوم کی حالت تیزی سے بدل رہی ہے۔