امریکی ٹیرف کے خدشات، سونے کی قیمت میں اضافہ

سونے کی قیمتوں میں بدھ کے روز مزید اضافہ ہوا، جبکہ گزشتہ سیشن میں ریکارڈ سطح پر پہنچنے کے بعد سرمایہ کاروں نے امریکی ٹیرف کے ممکنہ اثرات کے پیش نظر محفوظ سرمایہ کاری کے طور پر سونے کو ترجیح دی ہے۔

اسپاٹ گولڈ 0.7 فیصد بڑھ کر 3,131.25 ڈالر فی اونس تک پہنچ گیا (0240 جی ایم ٹی تک)، جبکہ منگل کے روز یہ 3,148.88 ڈالر کی بلند ترین سطح پر پہنچا تھا۔ امریکی گولڈ فیوچر 0.4 فیصد اضافے کے ساتھ 3,159.90 ڈالر پر پہنچ گیا۔

میٹلز فوکس کے مینیجنگ ڈائریکٹر فلپ نیومین کے مطابق، ریکارڈ سطح تک مسلسل اضافے کی بنیادی وجہ محفوظ سرمایہ کاری کے طور پر سونے کی خریداری ہے، جبکہ جغرافیائی و سیاسی غیر یقینی صورتحال اب بھی برقرار ہے۔

نیومین نے مزید کہا کہ امریکی معیشت کی سست روی، مہنگائی میں ممکنہ اضافہ اور شرح سود میں ممکنہ کٹوتی آنے والے مہینوں میں سونے کی قیمت کو 3,300 ڈالر تک لے جا سکتی ہے۔

منڈی میں بےچینی برقرار ہے کیونکہ امریکی صدر ڈونلڈ ٹرمپ کے ”لبریشن ڈے“ کے نام سے اعلان کردہ نئے ٹیرف آج لاگو کیے جانے والے ہیں۔

ٹرمپ کی تجارتی پالیسی مہنگائی میں اضافے، معاشی سست روی اور تجارتی تنازعات میں شدت پیدا کر سکتی ہے، جس کے نتیجے میں سونا مزید مہنگا ہو سکتا ہے کیونکہ یہ عالمی عدم استحکام اور مہنگائی کے خلاف تحفظ فراہم کرتا ہے، خاص طور پر کم شرح سود کے ماحول میں۔

وائٹ ہاؤس نے تصدیق کی ہے کہ نئے ٹیرف عائد کیے جائیں گے، تاہم اس کے حجم اور دائرہ کار کی تفصیلات فراہم نہیں کیں۔

سونے کی قیمتوں میں اضافے کی دیگر وجوہات میں عالمی مرکزی بینکوں کی بڑھتی ہوئی طلب، امریکی فیڈرل ریزرو کی ممکنہ شرح سود میں نرمی، مشرق وسطیٰ اور یورپ میں جغرافیائی کشیدگی، اور گولڈ ایکسچینج ٹریڈڈ فنڈز میں بڑھتی ہوئی سرمایہ کاری شامل ہیں۔

اسٹیٹ اسٹریٹ گلوبل ایڈوائزرز میں گولڈ اسٹریٹیجی کے عالمی سربراہ آکاش دوشی کے مطابق، مارکیٹ اگلے 9 مہینوں میں 3,400 ڈالر فی اونس کے لیول کو آزما سکتی ہے۔

فیڈ حکام کو خدشہ ہے کہ ملازمتوں میں کمی واقع ہو سکتی ہے، لیکن ٹیرف سے پیدا ہونے والی مہنگائی کے خدشات ان کے لیے اقدامات کرنے کی راہ میں رکاوٹ ہیں۔

مارکیٹ کو آج جاری ہونے والی اے ڈی پی ایمپلائمنٹ رپورٹ اور جمعہ کو نان فارم پے رولز کے اعداد و شمار کا انتظار ہے۔

دیگر قیمتی دھاتوں میں اسپاٹ سلور 0.2 فیصد اضافے کے ساتھ 33.82 ڈالر فی اونس، پلاٹینم 0.8 فیصد اضافے کے ساتھ 987.66 ڈالر، اور پیلاڈیم 0.7 فیصد اضافے کے ساتھ 990.45 ڈالر پر پہنچ گیا۔