وزیر اعظم شہباز شریف نے 2025 کی پہلی انسداد پولیو مہم کا افتتاح کر دیا

وزیراعظم شہباز شریف نے ملک بھر میں سال 2025 کی پہلی انسداد پولیو مہم کا آغاز کردیا۔

یہ مہم 3 سے 9 فروری تک جاری رہے گی۔

افتتاحی تقریب سے خطاب کرتے ہوئے وزیراعظم نے پاکستان سے پولیو کے خاتمے کے لیے اپنی حکومت کے عزم کا اعادہ کیا۔

انہوں نے کہا کہ پولیو مہم کا ہدف لاکھوں بچوں کو قطرے پلانا ہےتاکہ ان کی صحت اور مستقبل محفوظ کیا جاسکے۔

پاکستان میں 2025 کا پہلا پولیو کیس 22 جنوری کو خیبر پختونخوا کے ڈیرہ اسماعیل (ڈی آئی) خان سے سامنے آیا تھا۔

سال 2024 میں مجموعی طور پر 73 کیسز رپورٹ ہوئے۔ ان میں سے 27 کا تعلق بلوچستان، 22 کا خیبر پختونخوا، 22 کا سندھ اور ایک ایک کا تعلق پنجاب اور اسلام آباد سے تھا۔

پولیو مفلوج کرنے والی بیماری ہے جبکہ یہ لاعلاج بھی ہے۔ اس بھیانک بیماری سے بچانے کے لیے پانچ سال سے کم عمر کے بچوں کے لیے کئی خوراکوں پر مشتمل پولیو ویکسین اور معمول کی ویکسینیشن شیڈول کی تکمیل انتہائی ضروری ہے تاکہ بیماری کیخلاف بچوں کی قوت مدافعت مضبوط ہوسکے۔

پاکستان میں بیماری کی روک تھام کیلئے ملک گیر مہم چلائی جاتی ہے جس میں پولیو عملہ گھر گھر جاکر بچوں کو حفاظتی قطرے بھی پلاتے ہیں جبکہ ایکسپینڈ پروگرام آن امیونائزیشن (ای پی آئی) کے تحت بچوں کو 12 بیماریوں سے بچاؤ کے ٹیکے بھی لگائے جاتے ہیں۔