ویون اور جاز کے سی ای اوز کی وزیر خزانہ سے ملاقات

ڈیووس میں ورلڈ اکنامک فورم (ڈبلیو ای ایف) کے سالانہ اجلاس 2025 کے موقع پر ویون گروپ کے سی ای او کان ترزیاوگلو اور جاز کے سی ای او عامر ابراہیم نے وزیر خزانہ محمد اورنگزیب سے ملاقات کی جس میں پاکستان کی معاشی پیش رفت اور ترقی اور شمولیت کو فروغ دینے میں ڈیجیٹل ادائیگیوں کے اہم کردار پر تبادلہ خیال کیا گیا۔

دونوں نے پاکستان کے حالیہ معاشی استحکام کو سراہتے ہوئے کہا کہ افراط زر کی شرح مئی 2023 میں 40 فیصد سے کم ہو کر جنوری 2025 میں 4.9 فیصد رہ گئی ہے۔ انہوں نے پائیدار ترقی اور ڈیجیٹل تبدیلی کے لئے سازگار ماحول پیدا کرنے کے لئے حکومت کی تعریف کی۔

کان ترزیاوگلو اور عامر ابراہیم نے مالی شمولیت کو آگے بڑھانے اور کیش لیس معیشت میں منتقلی کو تیز کرنے پر جاز کیش کے اثرات کو اجاگر کیا۔ سالانہ 34 ارب ڈالر سے زائد کی پروسیسنگ اور 44 ملین ماہانہ ٹرانزیکشنز کے ساتھ جاز کیش ایک مضبوط ادائیگیوں کا بنیادی ڈھانچہ تخلیق کر رہا ہے جو غیر رسمی مالی سرگرمیوں کو دستاویزی شکل دیتے ہوئے شہری اور دیہی دونوں معیشتوں کی حمایت کرتا ہے۔

اس بحث میں شفافیت کو فروغ دینے، چھوٹے کاروباروں کو بااختیار بنانے اور خاص طور پر خواتین اور پسماندہ برادریوں کے لئے مالیاتی خدمات تک رسائی کو بہتر بنانے میں ڈیجیٹل ادائیگیوں کی تبدیلی کی صلاحیت پر زور دیا گیا۔

دونوں نے موبی لنک مائیکرو فنانس بینک لمیٹڈ (ایم ایم بی ایل) میں حالیہ براہ راست غیر ملکی سرمایہ کاری (ایف ڈی آئی) سے پاکستان کے لیے گروپ کے جاری عزم پر روشنی ڈالی۔ اس اسٹرٹیجک سرمایہ کاری کا مقصد جدید مائیکرو فنانس حل کے ذریعے مالیاتی شمولیت کو وسعت دینا اور معاشی اور سماجی خلا کو مزید پر کرنا ہے۔

دونوں نے پاکستان کی ڈیجیٹل تبدیلی میں مدد کے لئے سرکاری اور نجی تعاون کو فروغ دینے کی اہمیت پر زور دیا۔ انہوں نے ایسی پالیسیوں کی ضرورت پر تبادلہ خیال کیا جو ڈیجیٹل انفراسٹرکچر میں سرمایہ کاری کی حوصلہ افزائی کریں، مالی شمولیت میں اضافہ کریں اور پاکستان کی مکمل معاشی صلاحیت کو کھولنے کے لئے جدت طرازی کو فروغ دیں۔

“ڈیجیٹل ادائیگیاں معاشی لچک اور شمولیت کا ایک سنگ بنیاد ہیں،“کان ترزیاوگلو نے تبصرہ کیا. عامر ابراہیم نے اس بات پر زور دیتے ہوئے کہا کہ فنانشل ٹیکنالوجی میں سرمایہ کاری کرکے پاکستان ایک پائیدار اور شفاف معیشت تشکیل دے سکتا ہے جس سے اس کے تمام شہری مستفید ہوں گے۔

اجلاس میں جاز اور ویون کی جانب سے پاکستان میں جدت طرازی، شمولیت اور پائیدار ترقی کے عزم کا اعادہ کیا گیا جو ڈیجیٹل طور پر بااختیار اور معاشی طور پر مستحکم مستقبل کے لیے ان کے مشترکہ وژن کی عکاسی کرتا ہے۔

کاپی رائٹ بزنس ریکارڈر، 2025