پی آئی اے بیڑے کو جدید بنانے کیلئے پاکستان کا برطانیہ سے تعاون لینے کا فیصلہ

پاکستان اور برطانیہ نے ہوا بازی کے شعبے میں تعاون پر تبادلہ خیال کیا، جس میں پاکستان انٹرنیشنل ایئرلائنز (پی آئی اے) کے لیے ایئربس اور رولز رائس کے طیاروں اور انجنوں کے ممکنہ انتظامات بھی شامل ہیں۔ فوری طور پر بیڑے کی ضروریات پوری کرنے کے لیے برطانیہ کی جانب سے ایکسپورٹ کریڈٹ سپورٹ اور لیزنگ کے آپشنز بھی زیر غور آئے۔

یہ پیش رفت اس وقت سامنے آئی جب پاکستان اور برطانیہ نے ترجیحی شعبوں میں تجارت اور تعاون کو مزید فروغ دینے اور آئندہ دوطرفہ تجارتی مذاکرات کے ذریعے ٹھوس نتائج حاصل کرنے پر تبادلہ خیال کیا۔ یہ بات جمعرات کو وفاقی وزیر تجارت جام کمال خان اور پاکستان میں برطانوی ہائی کمشنر جین میریئٹ کے درمیان ملاقات کے بعد جاری بیان میں کہی گئی۔

بیان کے مطابق برطانوی سفیر نے وزیر تجارت کو ایئربس اور رولز رائس سے متعلق روابط کے بارے میں آگاہ کیا، جن میں پی آئی اے کے لیے ممکنہ طیاروں اور انجنوں کے انتظامات اور ممکنہ ایکسپورٹ کریڈٹ سپورٹ شامل ہیں۔ طیاروں کی لیزنگ پر بھی بات ہوئی تاکہ طویل مدتی خریداری کے آپشنز پر غور کے دوران فوری بیڑے کی ضروریات پوری کی جاسکیں۔

جام کمال نے کہا کہ پی آئی اے کے براہ راست بین الاقوامی روٹس ایک اہم تجارتی فائدہ فراہم کرتے ہیں اور مسافروں کا اعتماد بحال کرنے کے لیے خدمات کے معیار، قابلِ اعتماد کارکردگی اور بیڑے کو جدید بنانے کی ضرورت پر زور دیا۔

گزشتہ ماہ وزیر خزانہ محمد اورنگزیب نے بوئنگ گلوبل کے صدر ڈاکٹر برینڈن نیلسن کے ساتھ پی آئی اے کے بیڑے کو جدید بنانے اور نئے طیاروں کے ممکنہ حصول کے حوالے سے بات چیت شروع کی تھی، جس میں طیاروں کی جلد ترسیل کے مواقع اور عبوری لیزنگ کے انتظامات کے آپشنز تلاش کرنا بھی شامل تھا۔

بعد ازاں محمد اورنگزیب نے امریکی ایکسپورٹ امپورٹ بینک کے چیئرمین جان جووانووچ سے ملاقات کی تاکہ پی آئی اے کے مجوزہ طیاروں کی خریداری، بالخصوص بوئنگ 787 ڈریم لائنرز کے لیے مالی معاونت کے مواقع حاصل کیے جاسکیں۔ انہوں نے بوئنگ کے طیاروں میں پی آئی اے کی دلچسپی اور گراؤنڈ کیے گئے بوئنگ 777 طیاروں کو دوبارہ سروس میں لانے کے لیے اسپیئر پارٹس کی ضرورت پر زور دیا۔

جمعرات کو ہونے والی ملاقات میں برطانوی فریق نے ایک طویل مدتی سرمایہ کاری شراکت داری کا امکان بھی پیش کیا، جسے وزارتی سطح پر حمایت حاصل ہوگی اور جو باہمی طور پر طے شدہ شعبوں میں تعاون کے لیے ایک فریم ورک فراہم کرے گی۔ ممکنہ شعبوں میں ضابطہ جاتی اصلاحات، تجارت میں سہولت کاری، تعلیم اور افرادی قوت کی مہارتیں، اور سرمایہ کاری کی مالی معاونت شامل ہیں۔

جام کمال نے لائیو اسٹاک کو تعاون کے لیے ایک اہم شعبہ قرار دیتے ہوئے کہا کہ وزیراعظم اس شعبے کو مضبوط بنانے، جانوروں کی پیداواری صلاحیت بہتر بنانے اور ویلیو ایڈیشن اور گوشت کی برآمدات بڑھانے میں گہری دلچسپی رکھتے ہیں۔ انہوں نے جدید لائیو اسٹاک طریقوں اور مضبوط تجارتی روابط کے فروغ کے لیے برطانوی مہارت، ٹیکنالوجی اور سرمایہ کاری کے مواقع کو اجاگر کیا۔

برطانوی ہائی کمشنر نے شعبے کی ترقی میں خوراک کے تحفظ اور ضابطہ جاتی تقاضوں کو شامل کرنے کی اہمیت پر زور دیا تاکہ پاکستانی پیداوار کنندگان برطانیہ اور دیگر بین الاقوامی منڈیوں تک رسائی حاصل کرسکیں۔ ملاقات میں صحت اور لائف سائنسز کے ورکنگ گروپ کے ذریعے جاری روابط کا بھی جائزہ لیا گیا۔

وزیر تجارت نے پاکستانی مصنوعات کی بین الاقوامی سطح پر برانڈنگ مضبوط بنانے اور ملکی کاروباری اداروں کو بیرون ملک منڈیوں میں زیادہ مضبوط موجودگی پیدا کرنے میں مدد دینے کی ضرورت پر زور دیا۔ اس سلسلے میں پاکستانی گلابی نمک، زیتون کے تیل، غذائی مصنوعات، ٹیکسٹائل اور جراحی کے آلات کو معیاری یقین دہانی، ویلیو ایڈیشن اور مؤثر مارکیٹنگ کے ذریعے فروغ دینے کے مواقع پر تبادلہ خیال کیا گیا۔

دونوں فریقوں نے اس امر کو تسلیم کیا کہ پاکستانی کاروباری اداروں کے لیے اپنے برانڈز تیار کرنے اور ان مصنوعات سے زیادہ قدر حاصل کرنے کے وسیع امکانات موجود ہیں جو پہلے ہی بین الاقوامی منڈیوں میں فراہم کی جارہی ہیں۔ انہوں نے پاکستانی غذائی کاروبار اور ریستوران برانڈز کی برطانیہ میں موجودگی کو وسعت دینے کے مواقع پر بھی بات کی۔

برطانوی ہائی کمشنر نے پاکستان کی جاری معاشی اصلاحات، بشمول ضابطہ جاتی اور ٹیکس اصلاحات کے لیے جاری کوششوں کو سراہا۔

ملاقات میں اسلامی مالیات کے شعبے میں تعاون کے امکانات بھی تلاش کیے گئے، جن میں برطانیہ میں مقیم پاکستانی تارکینِ وطن کے ساتھ مالیاتی روابط مضبوط بنانے کے مواقع شامل ہیں۔

معدنیات کے شعبے کے حوالے سے وزیر تجارت نے پاکستان کی مقامی صلاحیتوں کو فروغ دینے کے لیے تجربہ کار تکنیکی شراکت داروں، پیشہ ورانہ معدنی تلاش کی خدمات اور مشترکہ منصوبوں کی ضرورت پر زور دیا۔

برطانوی فریق نے معدنیات کے شعبے کے لیے قانونی، مالیاتی، انشورنس اور دیگر معاون خدمات میں ممکنہ تعاون کی نشاندہی کی اور مجوزہ معدنیات کانفرنس میں برطانوی کاروباری اداروں کی شرکت کو آسان بنانے میں دلچسپی کا اظہار کیا۔