تعمیراتی شعبے کے فروغ کے لیے خصوصی گاڑیوں اور مشینری پر کسٹمز ڈیوٹی میں کمی کا فیصلہ

حکومت نے تعمیراتی شعبے کے فروغ کے لیے خصوصی گاڑیوں اور مشینری پر عائد کسٹمز ڈیوٹی کم کرنے کا فیصلہ کیا ہے۔

اس کے علاوہ فارماسیوٹیکل شعبے کو سہولت فراہم کرنے کے لیے خام مال، خصوصاً کینسر کی ادویات کی تیاری میں استعمال ہونے والے خام مال پر کسٹمز ڈیوٹی ختم کر دی جائے گی۔

یہ پیش رفت بدھ کو وزیراعظم شہباز شریف کی زیر صدارت قومی معیشت کی مجموعی صورتحال اور قومی ٹیرف پالیسی پر عمل درآمد کے جائزہ اجلاس میں سامنے آئی۔

اجلاس سے خطاب کرتے ہوئے وزیراعظم نے کہا کہ برآمدات پر مبنی اقتصادی ترقی کے اہداف کا حصول حکومت کی اولین ترجیح ہے۔ ملک میں صنعت، تجارت اور سرمایہ کاری کے فروغ کے لیے نیشنل ٹیرف کمیشن (این ٹی سی) کی فعال اور شفاف کارکردگی ناگزیر ہے۔

انہوں نے کہا کہ این ٹی سی کو سرمایہ کاروں اور صنعتکاروں کی سہولت کاری میں فعال کردار ادا کرنا چاہیے۔

وزیراعظم نے مزید کہا کہ دنیا میں رائج بہترین عالمی طریقہ کار اور جدید ٹیکنالوجی، بالخصوص انفارمیشن ٹیکنالوجی اور مصنوعی ذہانت (اے آئی)، کو اپناتے ہوئے این ٹی سی کے نظام میں جدت لائی جائے۔

اجلاس کو قومی ٹیرف پالیسی 2025-30 پر عمل درآمد کے حوالے سے بریفنگ دی گئی۔

بریفنگ میں بتایا گیا کہ قومی ٹیرف پالیسی 2025-30 کے تحت مختلف شعبوں کے لیے ٹیرف میں مرحلہ وار کمی کی جائے گی، جس کا مقصد برآمدات پر مبنی اقتصادی نمو کے اہداف حاصل کرنا ہے۔

لاجسٹکس شعبے کی ترقی اور فروغ کے لیے ریفرز (ریفریجریٹڈ ٹرانسپورٹ یونٹس)، کنٹینرز اور سیمی ٹریلرز پر عائد ڈیوٹیز بھی ختم کر دی جائیں گی۔

اجلاس میں نائب وزیراعظم و وزیر خارجہ اسحاق ڈار، وفاقی وزیر قانون و انصاف اعظم نذیر تارڑ، وفاقی وزیر موسمیاتی تبدیلی مصدق ملک، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وزیر پیٹرولیم علی پرویز ملک، وزیر مملکت برائے خزانہ و ریلوے بلال اظہر کیانی، وزیراعظم کے معاونِ خصوصی ہارون اختر اور دیگر اعلیٰ سرکاری حکام نے شرکت کی۔