وزیرِاعظم کی صنعتیں منتقل کرنے کی اپیل، پاکستان چین کمپنیوں کے درمیان 7 ارب ڈالر معاہدے

چین کے شہر ہانگژو میں منعقدہ پاکستان-چین بزنس ٹو بزنس (بی ٹو بی) انویسٹمنٹ کانفرنس کے دوران پاکستانی اور چینی کمپنیوں کے درمیان مختلف شعبوں میں تعاون اور سرمایہ کاری کے لیے 7 ارب ڈالر سے زائد مالیت کے معاہدوں اور مفاہمتی یادداشتوں (ایم او یوز) پر دستخط کیے گئے۔

کانفرنس میں آئی ٹی و ٹیلی کام، بیٹری انرجی اسٹوریج سسٹمز اور زراعت سمیت مختلف شعبوں میں مشترکہ منصوبوں پر اتفاق کیا گیا۔ اس موقع پر وزیرِاعظم شہباز شریف نے چینی کمپنیوں اور سرمایہ کاروں کو پاکستان میں صنعتیں منتقل کرنے، مقامی کمپنیوں کے ساتھ جوائنٹ وینچرز قائم کرنے اور سرمایہ کار دوست پالیسیوں سے فائدہ اٹھانے کی دعوت دی۔

وزیرِاعظم نے کہا کہ چین میں مزدوری کی لاگت میں اضافہ ہو چکا ہے، اس لیے وہ صنعتیں جو اب چین میں کم مسابقتی ہیں، پاکستان منتقل ہو سکتی ہیں۔ انہوں نے کہا کہ چینی کمپنیاں پاکستان میں پلانٹ اور مشینری لا کر مقامی شراکت داروں کے ساتھ مصنوعات تیار کریں اور انہیں تیسرے ممالک کو برآمد کریں، جو دونوں ممالک کے لیے ون ون ماڈل ثابت ہوگا۔

شہباز شریف نے کراچی میں قائم خصوصی اقتصادی زون میں سرمایہ کاری کی بھی پیشکش کی اور کہا کہ 6,000 ایکڑ پر مشتمل اس زون میں عالمی معیار کی سہولیات، جدید انفراسٹرکچر، ون ونڈو آپریشن اور ریڈ کارپٹ سہولت فراہم کی جائے گی۔ انہوں نے کہا کہ زمین چینی سرمایہ کاروں کو طویل المدتی لیز پر انتہائی پرکشش شرائط پر دی جائے گی۔

وزیرِ اعظم نے معدنیات، زراعت، آئی ٹی اور مصنوعی ذہانت (اے آئی) کے شعبوں کو دوطرفہ تعاون کے اہم شعبے قرار دیا۔ انہوں نے کہا کہ چین ہر سال تقریباً 100 ارب ڈالر کی زرعی مصنوعات درآمد کرتا ہے جبکہ پاکستان کا حصہ بہت کم ہے، تاہم آئندہ 5 سے 7 برس میں زرعی تجارت کو 10 ارب ڈالر تک بڑھایا جا سکتا ہے۔

تقریب میں نائب وزیرِ اعظم اسحاق ڈار، وزیرِ آئی ٹی شزا فاطمہ خواجہ، وزیرِ اطلاعات عطا اللہ تارڑ، وزیرِ غذائی تحفظ رانا تنویر حسین اور دیگر حکام بھی شریک تھے۔

اس موقع پر ہاؤلو انجینئرنگ اینڈ ٹیکنالوجی کمپنی اور فوجی فرٹیلائزر کے درمیان 1.12 ارب ڈالر مالیت کے کھاد سازی منصوبے کا معاہدہ بھی ہوا، جبکہ آئی بی آئی بیجنگ یونائیٹڈ انفارمیشن ٹیکنالوجی کمپنی اور آر آئی سی کے درمیان زرعی کیمیکلز اور زرعی مشینری کی پیداوار کے لیے 100 ملین ڈالر کی ایم او یو پر دستخط کیے گئے۔