آبنائے ہرمز میں ایران کا کروز میزائلوں سے اماراتی آئل ٹینکروں پر حملہ، بھارتی شہر ہلاک

آبنائے ہرمز میں کشیدگی مزید شدت اختیار کر گئی ہے، جہاں متحدہ عرب امارات کے دو آئل ٹینکروں پر ایرانی کروز میزائل حملوں میں ایک بھارتی شہری ہلاک جبکہ آٹھ افراد زخمی ہوگئے۔

متحدہ عرب امارات کی وزارت دفاع کے مطابق ممباسا اور البحیہ نامی آئل ٹینکروں کو آبنائے ہرمز کی جنوبی گزرگاہ میں عمان کی سمندری حدود کے اندر نشانہ بنایا گیا۔ وزارت کے مطابق ہلاک ہونے والا بھارتی شہری ٹینکر ممباسا پر تعینات تھا۔

وزارت دفاع نے بتایا کہ زخمی ہونے والوں میں چار کی حالت تشویشناک ہے، جبکہ زخمیوں میں چھ بھارتی اور دو یوکرینی شہری شامل ہیں۔ حملوں کے نتیجے میں دونوں ٹینکروں میں آگ بھڑک اٹھی، تاہم بعد ازاں آگ پر قابو پالیا گیا۔ امارات نے اس واقعے کو کھلی جارحیت قرار دیتے ہوئے کہا ہے کہ اسے اس حملے کا جواب دینے کا مکمل حق حاصل ہے۔

دوسری جانب ایران کے پاسدارانِ انقلاب (آئی آر جی سی) نے دعویٰ کیا کہ آبنائے ہرمز میں دو خلاف ورزی کرنے والے سپر ٹینکروں کو بار بار تنبیہ کے باوجود ممنوعہ راستے سے گزرنے، نیویگیشن سسٹم بند کرنے اور بارودی راستہ اختیار کرنے پر نشانہ بنا کر ناکارہ بنایا گیا۔ تاہم پاسدارانِ انقلاب نے ٹینکروں کے نام ظاہر نہیں کیے۔

ادھر برطانیہ کی یو کے میری ٹائم ٹریڈ آپریشنزنے بھی اطلاع دی کہ عمان کے علاقے قلہات سے تقریباً 40 ناٹیکل میل شمال مشرق میں ایک آئل ٹینکر نامعلوم میزائل کی زد میں آیا، تاہم تمام عملہ محفوظ رہا۔

یہ واقعہ ایسے وقت پیش آیا ہے جب امریکا مسلسل تیسرے روز ایران پر فضائی حملے کر رہا ہے اور صدر ڈونلڈ ٹرمپ نے ایرانی جہاز رانی کے خلاف بحری ناکہ بندی بحال کرتے ہوئے آبنائے ہرمز کی نگرانی کے لیے 20 فیصد فیس عائد کرنے کی تجویز بھی دی ہے۔ تجزیہ کاروں کے مطابق بڑھتی ہوئی کشیدگی عالمی توانائی کی ترسیل اور تیل کی قیمتوں پر مزید دباؤ ڈال سکتی ہے۔