پاکستان کی 11 شہریوں کی وطن واپسی، سنگاپور سے 20 ایرانی شہریوں کی واپسی میں معاونت
- پاکستان کی سفارتی کوششوں کے نتیجے میں بین الاقوامی پانیوں میں امریکی حکام کی تحویل میں لیے گئے 11 پاکستانی اور 20 ایرانی شہریوں کی کامیاب وطن واپسی ممکن ہوئی
نائب وزیرِاعظم اور وزیرِ خارجہ اسحاق ڈار نے جمعہ کے روز کہا ہے کہ پاکستان نے بین الاقوامی پانیوں میں امریکی کارروائی کے دوران قبضے میں لیے گئے بحری جہازوں پر موجود 11 پاکستانی شہریوں کو کامیابی سے وطن واپس پہنچا دیا ہے، جبکہ 20 ایرانی شہریوں کی واپسی میں بھی سہولت فراہم کی گئی ہے۔
انہوں نے اپنے بیان میں کہا کہ یہ تمام 31 افراد صحت مند اور خوش و خرم ہیں۔ اسحاق ڈار نے مزید کہا کہ بیرونِ ملک مقیم پاکستانیوں کی فلاح و بہبود، خصوصاً مشکل حالات میں پھنسے شہریوں کی معاونت، حکومت کی اولین ترجیح ہے۔
انہوں نے کہا کہ یہ افراد سنگاپور سے بنکاک کا سفر کر چکے تھے اور ایک ایسی پرواز میں سوار تھے جو جمعہ کی رات اسلام آباد پہنچنے کے لیے شیڈول تھی۔ بعد ازاں ایرانی شہریوں کو ایران واپسی کے لیے سہولت فراہم کی جائے گی۔
اسحاق ڈار نے اس عمل کے دوران تعاون اور معاونت پر سنگاپور کے وزیرِ خارجہ ویوین بالا کرشنن، حکومتِ سنگاپور اور سنگاپور کے وزیرِاعظم کا شکریہ ادا کیا۔
انہوں نے ایرانی وزیرِ خارجہ عباس عراقچی کا بھی ایران کے شہریوں کی وطن واپسی کے لیے پاکستان پر اعتماد کرنے پر اظہارِ تشکر کیا۔
نائب وزیرِاعظم نے امریکی حکومت، بشمول وزیرِ خارجہ مارکو روبیو، کا بھی پاکستانی اور ایرانی شہریوں کی باحفاظت واپسی کے لیے رابطہ کاری اور سہولت کاری پر شکریہ ادا کیا۔
انہوں نے تھائی لینڈ کی حکومت کا بھی بنکاک کے ذریعے ٹرانزٹ میں سہولت فراہم کرنے پر شکریہ ادا کیا۔
اسحاق ڈار نے وزارتِ خارجہ، وزارتِ داخلہ اور سنگاپور و تھائی لینڈ میں پاکستان کے سفارتی مشنز کے افسران کی کاوشوں کو بھی سراہا، جنہوں نے اس بحفاظت اور کامیاب وطن واپسی کے عمل کو یقینی بنایا۔