ایس آئی ایف سی کا اسلام آباد میں خصوصی اقتصادی زون قائم کرنے کا فیصلہ

خصوصی سرمایہ کاری سہولت کونسل (ایس آئی ایف سی) وفاقی دارالحکومت میں خصوصی اقتصادی زون (ایس ای زیڈ) کے قیام کے لیے موزوں جگہ کی نشاندہی پر کام کر رہی ہے۔ اس سلسلے میں پنجاب حکومت سے مشاورت جاری ہے اور توقع ہے کہ یہ معاملہ جلد از جلد حل کر لیا جائے گا۔

یہ بات ایس آئی ایف سی کے نیشنل کوآرڈینیٹر لیفٹیننٹ جنرل اسد الرحمٰن افضل چیمہ نے جمعے کو یہاں اسلام آباد چیمبر آف کامرس اینڈ انڈسٹری (آئی سی سی آئی) کے صدر محمد ذکریا اکبر ضیا کی قیادت میں آنے والے وفد سے ملاقات کے دوران کہی۔

وفاقی دارالحکومت کی کاروباری برادری نے اسلام آباد کے تاجروں کو درپیش اہم مسائل کی نشاندہی کی اور صنعتی ترقی، سرمایہ کاری کے فروغ اور معاشی نمو کے لیے اقدامات پر تبادلہ خیال کیا۔ وفد میں چیمبر کے سینئر نائب صدر محمد اشفاق حسین چھٹہ اور سیکریٹری جنرل غلام مرتضیٰ بھی شامل تھے۔

ایس آئی ایف سی کے کوآرڈینیٹر نے کاروباری برادری کے تحفظات سنتے ہوئے وفد کو یقین دلایا کہ مسائل مناسب حل کے لیے متعلقہ حکام کے ساتھ اٹھائے جائیں گے۔

انہوں نے کہا کہ کاروباری برادری اپنے ضابطہ جاتی اور انتظامی مسائل فوری کارروائی اور حل کے لیے ایس آئی ایف سی پورٹل کے ذریعے بھی جمع کرا سکتی ہے، کیونکہ کونسل ایسی شکایات ضروری کارروائی کے لیے متعلقہ سرکاری محکموں اور حکام کو بھجواتی ہے۔

انہوں نے اسلام آباد میں جدید طرز کا نمائشی مرکز قائم کرنے کی تجویز کی بھی حمایت کی اور تجارت، سرمایہ کاری اور کاروباری سرگرمیوں کے فروغ میں اس کی اہمیت کو تسلیم کیا۔

ایس آئی ایف سی کے کوآرڈینیٹر نے کراچی انڈسٹریل اسٹیٹ میں سرمایہ کاری کے امکانات کو بھی اجاگر کیا اور کاروباری برادری کو وہاں دستیاب سہولتوں سے فائدہ اٹھانے اور سرمایہ کاری کے مواقع تلاش کرنے کی ترغیب دی۔