ڈیزل 2 روپے 29 پیسے فی لیٹر مہنگا، پیٹرول کی قیمت برقرار

حکومت نے ہائی اسپیڈ ڈیزل (ایچ ایس ڈی) کی قیمت میں 2.29 روپے فی لیٹر اضافہ کردیا ہے، جس کے بعد اس کی قیمت 400.67 روپے سے بڑھ کر 402.96 روپے فی لیٹر ہوگئی ہے، جبکہ پیٹرول کی قیمت 377.91 روپے فی لیٹر پر برقرار رکھی گئی ہے۔ نئی قیمتوں کا اطلاق 31 اکتوبر 2026 سے ہوگا۔

آئل اینڈ گیس ریگولیٹری اتھارٹی (اوگرا) کی جانب سے جمعے کے روز جاری کردہ پریس ریلیز کے مطابق ریگولیٹر نے وفاقی حکومت کے پیٹرولیم قیمتوں کے تعین کے طریقہ کار کے تحت پیٹرولیم مصنوعات کی ایکس ڈپو قیمتوں میں ردوبدل کیا ہے۔

نئی قیمتیں 31 اکتوبر سے 2 نومبر تک مؤثر رہیں گی۔

اوگرا نے کہا ہے کہ قیمتوں میں ردوبدل عالمی صورت حال کے باعث کیا گیا ہے، جس میں پلیٹس نرخوں، پریمیم اور دیگر ضمنی اخراجات میں تبدیلی بھی شامل ہے۔

جمعرات کے روز حکومت نے ڈیزل کی قیمت میں 0.85 روپے فی لیٹر اضافہ کرکے 400.67 روپے کردی تھی، جبکہ پیٹرول کی قیمت 377.91 روپے فی لیٹر پر برقرار رکھی تھی۔

عالمی منڈی میں جمعے کے روز تیل کی قیمتوں میں اضافہ ہوا اور قیمتیں مسلسل چوتھے ماہانہ اضافے کی جانب گامزن رہیں۔ سرمایہ کار امریکا کے وسط مدتی انتخابات کے بعد ایران اور امریکا کے درمیان تنازع مزید شدت اختیار کرنے کے خدشات کے پیش نظر محتاط رہے، جبکہ آبنائے ہرمز میں ایک آئل ٹینکر پر حملے نے جنگ کے باعث تیل کی رسد کو لاحق خطرات نمایاں کردیے۔

دسمبر کے لیے برینٹ خام تیل کے مستقبل کے سودے، جن کی مدت جمعے کو ختم ہورہی ہے، 2.74 ڈالر یا 2.4 فیصد اضافے سے 117.62 ڈالر فی بیرل ہوگئے، جبکہ 10:45 جی ایم ٹی پر زیادہ فعال جنوری کے سودے 2.78 ڈالر اضافے سے 113.58 ڈالر فی بیرل پر پہنچ گئے۔

امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کے مستقبل کے سودوں کی قیمت بھی 2.18 ڈالر یا 2.1 فیصد بڑھ کر 104.18 ڈالر فی بیرل ہوگئی۔