البانیا کے رہنما نے مستعفی ہونے کے مطالبات مسترد کردیے، دارالحکومت میں طلبہ کا احتجاج پرتشدد ہوگیا

البانیا میں ہزاروں طلبہ نے بدعنوانی، تعلیم کے بڑھتے اخراجات اور سرکاری پالیسیوں کے خلاف احتجاج کرتے ہوئے وزیراعظم ایڈی راما سے مستعفی ہونے کا مطالبہ کیا۔ مظاہرین نے دارالحکومت تیرانا میں توڑ پھوڑ کی اور پولیس سے جھڑپیں کیں، جس پر پولیس نے واٹر کینن اور آنسو گیس استعمال کی۔

طلبہ کا کہنا ہے کہ حکومت ان کے مسائل سننے میں ناکام رہی ہے، جبکہ مہنگائی، روزگار کے محدود مواقع اور مبینہ بدعنوانی نے عوام کی مشکلات بڑھا دی ہیں۔ احتجاج کے دوران کچرے کے ڈبے جلائے گئے، بس اسٹاپس اور ٹریفک سگنلز کو نقصان پہنچایا گیا۔

وزیراعظم ایڈی راما نے مستعفی ہونے کا مطالبہ مسترد کرتے ہوئے کہا کہ وہ تعلیم کے بڑھتے اخراجات پر بات چیت کے لیے تیار ہیں، تاہم سرکاری املاک کو نقصان پہنچانا اور عوامی تحفظ کو خطرے میں ڈالنا جائز مطالبات کا حصہ نہیں۔

یہ احتجاج جنوبی ساحلی علاقے میں لگژری ریزورٹ کی تعمیر کے منصوبے کے خلاف کئی ماہ سے جاری مظاہروں کے بعد شدت اختیار کرگیا ہے۔ البانیا یورپی یونین میں شمولیت کے لیے کوشاں ہے اور 2028 تک رکنیت حاصل کرنے کا ہدف رکھتا ہے۔