امریکی افراطِ زر کے اعداد و شمار سے قبل عالمی منڈی میں سونے کی قیمتیں مستحکم

عالمی منڈی میں بدھ کو سونے کی قیمتیں مستحکم رہیں، کیونکہ سرمایہ کار امریکی افراطِ زر کے تازہ اعداد و شمار کے منتظر ہیں، جن سے امریکی مرکزی بینک فیڈرل ریزرو کی آئندہ مالیاتی پالیسی سے متعلق اشارے ملنے کی توقع ہے۔

عالمی منڈی میں سونے کی فی اونس قیمت 4,159.45 ڈالر پر برقرار رہی، جبکہ دسمبر میں فراہمی کے لیے امریکی سونے کے سودوں کی قیمت 0.1 فیصد اضافے کے بعد 4,182.60 ڈالر فی اونس ہوگئی۔

ٹیسٹ لائیو کے سربراہ برائے عالمی معاشی امور الیا اسپیواک نے کہا کہ سونے کی قیمتوں میں فی الحال کوئی بڑی تبدیلی نہیں ہوئی اور یہ ایک محدود دائرے میں برقرار ہیں۔ تاہم، تیل کی قیمتوں میں اضافے کے باوجود سونے کی قیمتوں کا مستحکم رہنا اس بات کی نشاندہی کرتا ہے کہ دھات کی قیمتوں میں اضافے کے لیے نئی وجوہات سامنے آسکتی ہیں۔

دوسری جانب سعودی عرب کے مشرقی شہر ظہران میں سرکاری تیل کمپنی سعودی آرامکو کی انتظامی عمارت پر حملے اور یمن کے حوثیوں کے ساتھ کشیدگی بڑھنے کے بعد بدھ کو عالمی منڈی میں تیل کی قیمتوں میں اضافہ ہوا۔

نیویارک فیڈ کے صدر جان ولیمز نے رواں سال شرح سود میں مزید اضافے کی ضرورت پر زور دیا، جبکہ فیڈ گورنر کرسٹوفر والر کے مطابق امریکی بانڈز کے منافع میں حالیہ اضافہ افراطِ زر کے بجائے معاشی نمو میں بہتری کی عکاسی کرتا ہے۔

ادھر عالمی منڈی میں چاندی کی قیمت 0.6 فیصد کمی سے 59.11 ڈالر فی اونس ہوگئی، پلاٹینم 1,664.19 ڈالر پر مستحکم رہا، جبکہ پیلیڈیم کی قیمت 0.4 فیصد اضافے سے 1,130.81 ڈالر فی اونس ہوگئی۔