کراچی، گوادر بندرگاہوں کا بحری شعبے کو مضبوط بنانے پر غور

گوادر پورٹ اتھارٹی (جی پی اے) کے چیئرمین نورالحق بلوچ نے کراچی پورٹ ٹرسٹ (کے پی ٹی) کے ہیڈ آفس میں کے پی ٹی کے چیئرمین ریئر ایڈمرل شاہد احمد (ستارۂ امتیاز، نشانِ امتیاز) (ر) سے ملاقات کی جس میں پاکستان کے بحری شعبے کو مضبوط بنانے کے طریقوں پر تبادلہ خیال کیا گیا۔

تفصیلات کے مطابق کے پی ٹی چیئرمین نے اپنے دورے پر آئے ہوئے ہم منصب کا خیرمقدم کیا۔ دونوں فریقوں نے بدلتے ہوئے جغرافیائی سیاسی منظرنامے اور علاقائی شپنگ پر اس کے اثرات پر تبادلہ خیال کیا جبکہ کراچی اور گوادر دونوں بندرگاہوں سے متعلق موجودہ ٹریفک اعدادوشمار کا بھی جائزہ لیا۔

اجلاس میں بندرگاہی آپریشنز کو بحال و فعال کرنے، رابطوں کو بہتر بنانے، مسابقتی صلاحیت بڑھانے اور پاکستان کی بحری معیشت کی صلاحیتوں سے مزید استفادہ کرنے کے لیے عملی اور مستقبل پر مبنی اقدامات کا بھی جائزہ لیا گیا۔

یہ دورہ ملک کی دونوں بڑی بندرگاہوں کو مشترکہ بحری وژن کے تحت ہم آہنگ کرنے کی کوشش کی عکاسی کرتا ہے جس میں کراچی کا مستحکم تجارتی نیٹ ورک گوادر کی تزویراتی گہرے سمندر کی صلاحیت کو تقویت فراہم کرتا ہے۔