آئی اے ای اے سربراہ کا اسلام آباد ایم او یو پر عملدرآمد پر اتفاق

نائب وزیر اعظم و وزیر خارجہ سینیٹر محمد اسحاق ڈار اور آئی اے ای اے کے ڈائریکٹر جنرل اور اقوام متحدہ کے سیکرٹری جنرل کے لئے امیدوار سفیر رافیل گروسی نے خطے کی بدلتی ہوئی صورتحال پر تبادلہ خیال کیا۔

دونوں رہنماؤں نے اپنی ٹیلفونک گفتگو میں اس بات پر اتفاق کیا کہ کشیدگی کم کرنے کے لیے اسلام آباد مفاہمتی یادداشت (ایم او یو) پر عملدرآمد بہترین راستہ ہے۔ رافیل گروسی نے ضرورت پڑنے پر اس حوالہ سے تکنیکی معاونت فراہم کرنے کی پیشکش کی۔

نائب وزیر اعظم و وزیر خارجہ نے اقوام متحدہ کے منشور کے مقاصد اور اصولوں کو آگے بڑھانے اور بین الاقوامی قوانین اور معاہدوں کا احترام کرنے کے لیے پاکستان کے مستقل عزم کا اعادہ کیا۔

نائب وزیراعظم و وزیر خارجہ عالمی امن اور ترقی کے ایجنڈے کے حصول میں اقوام متحدہ کے نظام کی اہمیت کو بھی اجاگر کیا۔انہوں نے اقوام متحدہ کے سیکرٹری جنرل کے عہدے کے لیے اپنی مہم میں رافیل گروسی کے لیے نیک خواہشات کا اظہار کیا۔

دریں اثنا نائب وزیراعظم سینیٹر اسحاق ڈار نے منگل کو اقوام متحدہ کی جنرل اسمبلی کے 81ویں اجلاس (یو این جی اے) کے پروگرام کا جائزہ لینے کے لیے اجلاس کی صدارت کی۔

سیکریٹری خارجہ اور ایڈیشنل سیکریٹری (اقوام متحدہ) نے نائب وزیراعظم و وزیر خارجہ کو مجوزہ پروگرام کے بارے میں بریفنگ دی جس میں اعلیٰ سطح ملاقاتیں، دوطرفہ اجلاس اور یو این جی اے کے موقع پر ہونے والی دیگر اہم ملاقاتیں شامل ہیں۔

نائب وزیراعظم و وزیر خارجہ نے مجوزہ پروگرام کا جائزہ لیا، اس کی ترجیحات اور انتظامات کے حوالے سے ہدایات دیں اور ہدایت کی کہ اعلیٰ سطح اجلاس کے دوران پاکستان کی فعال شرکت کے لیے قریبی رابطہ کاری اور مکمل تیاری یقینی بنائی جائے۔

کاپی رائٹ بزنس ریکارڈر 2026