ٹی 20 عالمی چیمپئن بھارت پہلی بار جاپان کے مدمقابل
- دفاعی چیمپئن بھارت اور جاپان 22 ستمبر کو پہلی بار آمنے سامنے ہوں گے، جو جاپانی کرکٹ کے لیے ایک تاریخی سنگِ میل ثابت ہوگا
ٹی 20 انٹرنیشنل کے دفاعی چیمپئن بھارت 22 ستمبر کو توچیگی کے سانو انٹرنیشنل کرکٹ گراؤنڈ میں جاپان کے خلاف پہلی بار بین الاقوامی میچ کھیلے گا۔ دونوں کرکٹ بورڈز نے جمعہ کو اس بات کی تصدیق کی ہے۔
یہ ٹی 20 میچ مردوں کی کرکٹ میں جاپان کا انٹرنیشنل کرکٹ کونسل (آئی سی سی) کے کسی فل ممبر ملک کے خلاف پہلا مقابلہ ہوگا۔
جاپان کرکٹ ایسوسی ایشن (جے سی اے) کے چیف ایگزیکٹو ناؤکی میاجی نے ایک بیان میں کہا، ’’جاپان میں کرکٹ کے مرکز میں موجودہ عالمی چیمپئن کو مدعو کرنا ہماری ایسوسی ایشن کے لیے ایک تاریخی موقع ہے۔‘‘
جاپان 1989 میں آئی سی سی کا الحاقی رکن بنا تھا، جبکہ 2005 میں اسے ایسوسی ایٹ رکن کا درجہ حاصل ہوگیا۔
بی سی سی آئی کے اعزازی سیکریٹری دیواجیت سائکیا نے کہا، ’’بھارتی اور جاپانی مردوں کی ٹیموں کے جاپان میں خصوصی ٹی 20 انٹرنیشنل میچ کے لیے ایک ساتھ میدان میں اترنے کے اس تاریخی موقع کا حصہ بننے پر بی سی سی آئی کو بے حد خوشی ہے۔‘‘
Comments