ڈالر کے مقابلے میں روپیہ معمولی مضبوط

امریکی ڈالر کے مقابلے میں جمعہ کو روپے کی قدر میں معمولی اضافہ ریکارڈ کیا گیا۔

اسٹیٹ بینک کے مطابق انٹربینک مارکیٹ میں مقامی کرنسی 1 پیسے کے اضافے کے ساتھ 277.71 روپے پر بند ہوئی۔

جمعرات کو روپیہ 277.72 پر بند ہوا تھا۔

دوسری جانب ایشیائی مارکیٹ کی صبح امریکی ڈالر 0.4 فیصد اضافے کے بعد معمولی بہتری کے ساتھ 158.505 ین پر پہنچ گیا، جس کے بعد رواں ہفتے اس کی قدر میں مجموعی طور پر تقریباً 0.7 فیصد اضافے کا امکان ہے۔ یورو کے مقابلے میں بھی ڈالر معمولی مضبوط ہو کر 1.1521 ڈالر پر آ گیا، جبکہ گزشتہ سیشن میں بھی اس میں 0.3 فیصد کا اضافہ ہوا تھا۔

فنانشل ٹائمز کی ایک رپورٹ، جس میں فیڈرل ریزرو کے چیئرمین کیون وارش کے قریبی ذرائع کا حوالہ دیا گیا، میں آنے والے معاشی اعداد و شمار کی روشنی میں ستمبر میں شرح سود میں ممکنا اضافے کی جانب اشارہ کیا گیا ہے، جس کے بعد امریکی ٹریژری بانڈز کا منافع بڑھنے سے ڈالر کو مزید سہارا ملا۔ جمعہ کو بعد میں جاری ہونے والی امریکی روزگار (پے رول) کی ماہانہ رپورٹ فیڈرل ریزرو کے شرح سود سے متعلق مستقبل کے فیصلے کے بارے میں مزید اشارے فراہم کر سکتی ہے۔

عالمی سطح پر آبنائے ہرمز کی بحالی سے متعلق تشویش کے باعث جمعہ کو خام تیل کی قیمتوں میں اضافہ جاری رہا، کیونکہ ایران نے عمان کے ساتھ مل کر دشمن سمجھے جانے والے بحری جہازوں پر آبنائے سے گزرنے پر پابندی اور مجوزہ قوانین کی خلاف ورزی کرنے والوں پر بھاری جرمانے عائد کرنے کی تجویز دی ہے۔

گرینچ کے معیاری وقت (جی ایم ٹی) کے مطابق 0010 بجے برینٹ کروڈ کے فیوچرز 99 سینٹس یا 1.2 فیصد اضافے کے ساتھ 83.48 ڈالر فی بیرل پر پہنچ گئے۔ اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) کے فیوچرز 85 سینٹس یا 1.1 فیصد اضافے سے 78.84 ڈالر پر آ گئے۔ جمعرات کو بھی خام تیل کے فیوچرز میں 3 ڈالر فی بیرل سے زائد کا اضافہ دیکھا گیا تھا جب ایران نے آبنائے ہرمز سے امریکی اور اسرائیلی جہازوں کے گزرنے پر پابندی کے بل کا جائزہ لیا۔