سپر نیٹ ٹیکنالوجیز کو 1 ارب روپے کا بڑا کنٹریکٹ مل گیا

سپرنیٹ ٹیکنالوجیز لمیٹڈ نے بدھ کو اعلان کیا ہے کہ اسے پاکستان کے ایک ممتاز ادارے کو ہارڈویئر اور متعلقہ خدمات کی فراہمی کے لیے تقریباً ایک ارب روپے مالیت کا معاہدہ حاصل ہوا ہے۔

معاہدے کی معلومات آج پاکستان اسٹاک ایکسچینج کو بھیجے گئے ایک نوٹس کے ذریعے جاری کی گئیں۔

کمپنی کے مطابق اس منصوبے کے تحت اہم مواصلاتی انفرااسٹرکچر کی اپ گریڈیشن اور جدید خطوط پر استوار کرنے کا کام کیا جائے گا جسے مالی سال 2026-27 کے دوران مکمل کیے جانے کی توقع ہے۔

کمپنی نے کہا کہ اس معاہدے سے منصوبے کی مدت کے دوران سپرنیٹ کی آمدن میں نمایاں اضافہ اور منافع میں خاطر خواہ بہتری آنے کی توقع ہے۔

کمپنی نے مزید کہا کہ یہ کامیابی سپرنیٹ کی مضبوط مارکیٹ پوزیشن کی عکاسی کرتی ہے اور پاکستان کی ڈیجیٹل تبدیلی کے عمل میں جدید، قابلِ اعتماد اور محفوظ ٹیکنالوجی حل فراہم کرنے کے ذریعے گروپ کے عزم کو مزید مضبوط بناتی ہے۔

سپر نیٹ ٹیکنالوجیز لمیٹڈ مواصلاتی انفرااسٹرکچر، کنیکٹیوٹی، سائبر سکیورٹی، مینجڈ سروسز اور ڈیجیٹل ٹرانسفارمیشن سلوشنز فراہم کرنے کا تین دہائیوں سے زائد کا تجربہ رکھتی ہے۔

یہ تازہ ترین معاہدہ اس کے پروجیکٹ پورٹ فولیو کو مزید مضبوط کرتا ہے اور پاکستان کے اہم مواصلاتی نیٹ ورک کو جدید بنانے میں مقامی ٹیکنالوجی فراہم کنندگان کی مسلسل اہمیت کو اجاگر کرتا ہے۔