غنی کیمیکلز 2027 سے او جی ڈی سی ایل کی گیس کو سی این جی اور ایل پی جی میں تبدیل کرے گی

میڈیکل اور انڈسٹریل گیسز تیار کرنے والی پاکستان کی معروف کمپنی غنی کیمیکل انڈسٹریز لمیٹڈ (جی سی آئی ایل) کو آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کی جانب سے سندھ میں واقع سونو لاشاری فیلڈ سے قدرتی گیس نکالنے اور اس کی پروسیسنگ کا 5 سالہ کنٹریکٹ دے دیا گیا ہے۔

غنی کیمیکلز نے منگل کو پاکستان اسٹاک ایکسچینج (پی ایس ایکس) کو بھیجے گئے ایک نوٹس میں اس اہم پیش رفت سے آگاہ کیا۔

نوٹس کے مطابق اس معاہدے کے تحت او جی ڈی سی ایل کمپنی کو فیلڈ سے خام قدرتی گیس کا ایک مخصوص کوٹہ فراہم کرے گا، جسے ویلیو ایڈڈ ہائیڈرو کاربن مصنوعات بشمول کمپریسڈ نیچرل گیس (سی این جی)، لیکویفائیڈ پٹرولیم گیس (ایل پی جی) اور اس سے وابستہ ہائیڈرو کاربن کنڈنسیٹس میں تبدیل کیا جائے گا۔

کمپنی کو توقع ہے کہ ضروری انجینئرنگ، خریداری، ریگولیٹری منظوریوں اور سائٹ پر کام کی تیاری مکمل ہوتے ہی اس منصوبے پر عملدرآمد شروع کر دیا جائے گا، جبکہ باقاعدہ کاروباری آپریشنز کا آغاز 2027 کی پہلی سہ ماہی کے دوران متوقع ہے۔

نوٹس میں مزید بتایا گیا ہے کہ موجودہ تکنیکی ڈھانچے اور مارکیٹ کی صورتحال کے پیش نظر تجارتی آپریشنز کے آغاز پر اس منصوبے سے سالانہ تقریباً 1.5 سے 2 ارب روپے کی آمدنی حاصل ہونے کا امکان ہے۔

غنی کیمیکلز کا ماننا ہے کہ یہ منصوبہ انرجی پروسیسنگ کے شعبے میں کاروبار کو وسعت دینے کی اسٹریٹجی کا ایک اہم سنگ میل ہے، جس سے کنٹریکٹ کی مدت کے دوران کمپنی کی آمدنی میں مسلسل اضافے کا ایک نیا ذریعہ پیدا ہوگا۔ منصوبے کے مالیاتی اثرات کا آغاز تجارتی آپریشنز شروع ہونے کے بعد ہی ہوگا۔

واضح رہے کہ غنی کیمیکل انڈسٹریز لمیٹڈ 2015 میں بطور پرائیویٹ لمیٹڈ کمپنی قائم ہوئی تھی جسے 2017 میں پبلک لمیٹڈ کمپنی میں تبدیل کر دیا گیا۔ یہ کمپنی اس وقت انڈسٹریل اور میڈیکل گیسز کی تیاری کے لیے 5 جدید ترین اے ایس یوپلانٹس چلا رہی ہے۔