نائجر کے دارالحکومت میں ایئرپورٹ پر دھماکے اور شدید فائرنگ

نائجر کے دارالحکومت نیامی کے ایئرپورٹ کے قریب جمعرات کی صبح زوردار دھماکوں اور مسلسل فائرنگ کی آوازیں سنائی دیں جو ایک گھنٹے سے زائد جاری رہیں، جبکہ سکیورٹی فورسز نے علاقے کو گھیرے میں لے لیا، رائٹرز کے ایک عینی شاہد اور دو مقامی رہائشیوں نے بتایا۔

عینی شاہد کے مطابق پہلا دھماکہ مقامی وقت کے مطابق صبح تقریباً 6 بجے ہوا، جس کے بعد وقفے وقفے سے فائرنگ کا سلسلہ جاری رہا اور تقریباً دو گھنٹے بعد بھی کبھی کبھار گولیاں چلنے کی آوازیں سنی جا رہی تھیں۔

ایک سکیورٹی ذریعے نے بتایا کہ ابتدائی اطلاعات کے مطابق ایئرپورٹ کو حملے کا نشانہ بنایا گیا ہے، تاہم حکام کی جانب سے فوری طور پر اس کی تصدیق نہیں کی گئی۔

نائجر حکومت کے ترجمان نے واقعے پر فوری ردعمل دینے سے گریز کیا۔

یاد رہے کہ اس سے قبل جنوری میں اسی خطے میں داعش سے منسلک تنظیم نے ایئرپورٹ پر حملے کی ذمہ داری قبول کی تھی۔

نائجر، اپنے ہمسایہ ممالک مالی اور برکینا فاسو کی طرح، گزشتہ کئی برسوں سے القاعدہ اور داعش سے منسلک شدت پسند گروہوں کے حملوں کا سامنا کر رہا ہے، جن کے نتیجے میں ہزاروں افراد ہلاک اور لاکھوں بے گھر ہو چکے ہیں۔