ڈالر کے مقابلے میں روپیہ مزید تگڑا

انٹربینک مارکیٹ میں جمعہ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر انٹربینک میں ڈالر کے مقابلے میں روپیہ 3 پیسے کی بہتری سے 278.52 پر بند ہوا۔

یاد رہے کہ جمعرات کو مقامی کرنسی 278.55 روپے پر بند ہوئی تھی۔

ڈالر نے جمعہ کو چھ ہفتوں کی بلند ترین سطح کے قریب اپنی پوزیشن برقرار رکھی۔ یہ صورتحال امریکہ-ایران امن معاہدے کے حوالے سے متضاد اشاروں کے باعث گزشتہ رات کی اتار چڑھاؤ پر مبنی کاروباری سرگرمیوں کے بعد سامنے آئی تاہم سرمایہ کاروں نے کچھ پیش رفت کی امیدوں پر تکیہ کیے رکھا۔

مختلف کرنسیوں کے مقابلے میں ڈالر کی قدر معمولی اضافے کے ساتھ 99.24 پر رہی، جو گزشتہ سیشن میں دیکھی جانے والی 99.515 کی بلند ترین سطح سے زیادہ دور نہیں ہے اور یہ 7 اپریل کے بعد سے اس کی سب سے اعلیٰ ترین سطح ہے۔

یورو کی قدر میں 0.03 فیصد کی معمولی کمی دیکھی گئی اور یہ 1.1613 ڈالر پر آگیا، جبکہ برطانوی پاؤنڈ 1.3431 ڈالر پر مستحکم رہا۔ برطانیہ میں سیاسی افراتفری کے باعث گزشتہ ہفتے پاؤنڈ کی قدر میں 2 فیصد سے زائد کی گراوٹ آئی تھی، تاہم اس ہفتے اسٹرلنگ (پاؤنڈ) مجموعی طور پر 0.8 فیصد اضافے کی راہ پر گامزن رہا۔

ڈالر کو ان اقتصادی اعداد و شمار سے بھی مزید مدد ملی جن سے ظاہر ہوتا ہے کہ امریکہ میں گزشتہ ہفتے بیروزگاری کے ہفتہ وار دعووں میں کمی واقع ہوئی ہے۔