بھارت اور پیرو کے درمیان آزاد تجارتی معاہدے پر مذاکرات جون میں متوقع، سفیر

بھارت اور پیرو کے درمیان مجوزہ آزاد تجارتی معاہدے (ایف ٹی اے) پر آئندہ مذاکرات ممکنہ طور پر اگلے ماہ ہوں گے، جبکہ معاہدہ سال کے آخر تک طے پانے کا امکان ہے۔

پیرو کے سفیر برائے بھارت جاویئر پاؤلینچ نے رائٹرز کو بتایا کہ اصولی طور پر جون میں مذاکرات دوبارہ شروع کیے جائیں گے۔ انہوں نے کہا کہ دونوں ممالک کے درمیان فری ٹریڈ پیکٹ پر پیش رفت جاری ہے۔

انہوں نے مزید بتایا کہ پیرو اور بھارت کے درمیان اہم معدنیات خصوصاً کاپر کے حوالے سے ایک الگ بات چیت جاری ہے، کیونکہ پیرو دنیا کے بڑے تانبے پیدا کرنے والے ممالک میں شامل ہے۔

بھارتی کمپنی ہندالکو انڈسٹریز بھی پیرو سے کاپر خریدنے میں دلچسپی رکھتی ہے، تاہم اس پر بات چیت ابھی جاری ہے۔

پیرو نے 2024 میں تقریباً 2.7 ملین میٹرک ٹن کاپر پیدا کیا اور اسی شعبے میں 4.96 ارب ڈالر کی غیر ملکی سرمایہ کاری حاصل کی۔

بھارت، جو دنیا کی تیزی سے ترقی کرتی بڑی معیشتوں میں شامل ہے، اپنی بڑھتی ہوئی طلب کے باعث بیرون ملک معدنی وسائل میں سرمایہ کاری بڑھانے کی حکمت عملی پر عمل پیرا ہے تاکہ سپلائی چین محفوظ بنایا جا سکے۔

سرکاری اندازوں کے مطابق بھارت کو 2047 تک اپنی 91 سے 97 فیصد کاپر ضروریات کے لیے بیرونی ذرائع پر انحصار کرنا پڑ سکتا ہے۔