امریکہ-ایران معاہدے کی امید پر خام تیل کی قیمتوں میں کمی

عالمی منڈی میں تیل کی قیمتوں میں جمعرات کے روز ابتدائی کاروبار کے دوران کمی دیکھی گئی، جس کی بنیادی وجہ امریکہ اور ایران کے درمیان کشیدگی میں ممکنہ کمی کی امیدیں ہیں۔ اطلاعات کے مطابق ایران آبنائے ہرمز کے اطراف بحری جہازوں کو گزرنے کی اجازت دینے پر غور کر سکتا ہے، جس سے سرمایہ کاروں کے خدشات وقتی طور پر کم ہوئے ہیں۔

برینٹ کروڈ آئل کی قیمت 44 سینٹس یا 0.5 فیصد کمی کے ساتھ 94.49 ڈالر فی بیرل تک آ گئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ 70 سینٹس یا 0.8 فیصد کمی کے بعد 90.59 ڈالر فی بیرل پر ٹریڈ کرتا دیکھا گیا۔ بدھ کے روز دونوں بینچ مارکس میں معمولی اتار چڑھاؤ کے بعد استحکام رہا تھا۔

وائٹ ہاؤس نے ایران کے ساتھ جنگ کے خاتمے کے لیے معاہدے پر امید کا اظہار کیا ہے، تاہم ساتھ ہی خبردار کیا ہے کہ اگر تہران نے سخت مؤقف برقرار رکھا تو اس پر اقتصادی دباؤ مزید بڑھایا جائے گا۔ ذرائع کے مطابق ایران اس بات پر آمادہ ہو سکتا ہے کہ اگر تنازع دوبارہ نہ بڑھے تو آبنائے ہرمز کے عمانی حصے سے جہازوں کی آزادانہ آمد و رفت بحال کر دی جائے۔

تجزیہ کار توشیتاکا تزاوا کا کہنا ہے کہ اگرچہ کشیدگی میں کمی کی امید موجود ہے، لیکن ماضی میں مذاکرات بارہا ناکام ہونے کے باعث سرمایہ کار محتاط ہیں۔ ان کے مطابق جب تک کوئی حتمی امن معاہدہ نہیں ہو جاتا اور آبنائے ہرمز میں مکمل بحری آزادی بحال نہیں ہوتی، تیل کی قیمتیں 80 سے 100 ڈالر فی بیرل کے درمیان اتار چڑھاؤ کا شکار رہ سکتی ہیں۔

امریکہ-اسرائیل اور ایران کے درمیان حالیہ جنگ کے باعث عالمی سطح پر تیل اور گیس کی ترسیل شدید متاثر ہوئی ہے، کیونکہ آبنائے ہرمز دنیا کی تقریباً 20 فیصد تیل اور ایل این جی سپلائی کے لیے نہایت اہم راستہ ہے۔

دوسری جانب امریکہ نے ایرانی بندرگاہوں سے ہونے والی بحری تجارت کو مکمل طور پر روکنے کا دعویٰ کیا ہے، جبکہ امریکی محکمہ توانائی کے مطابق گزشتہ ہفتے خام تیل کے ذخائر میں 913,000 بیرل کی کمی واقع ہوئی، جو مارکیٹ کی توقعات کے برعکس ہے۔