فرید احمد تارڑ سی سی پی کے چیئرمین مقرر

وفاقی حکومت نے فرید احمد تارڑ کو مسابقتی کمیشن آف پاکستان (سی سی پی) کا نیا چیئرمین مقرر کر دیا ہے۔ یہ بات بدھ کو جاری ہونے والے سرکاری بیان میں کہی گئی ہے۔

فرید احمد تارڑ عوامی مالیاتی انتظام، ریگولیٹری اصلاحات اور اقتصادی نظم و نسق میں تین دہائیوں سے زائد تجربے کے حامل ہیں اور اپنے فرائض بخوبی انجام دے رہے ہیں۔

انہوں نے پاکستان میں اہم اصلاحاتی اقدامات میں بین الاقوامی ترقیاتی شراکت داروں کے ساتھ قریبی تعاون کیا ہے۔ وہ یورپی یونین کے فنڈ سے چلنے والے پبلک فنانشل مینجمنٹ (پی ایف ایم ) ریفارم پروگرام میں ٹیم لیڈر، فارین، کامن ویلتھ اینڈ ڈیولپمنٹ آفس ( ایف سی ڈی او) کے SEED پروگرام میں اسٹریٹجک پالیسی ایڈوائزر، اور یونیسف کے تعاون سے عوامی مالیاتی نظام مضبوط بنانے کے اقدام میں ٹیم لیڈر کے فرائض انجام دے چکے ہیں۔

ان عہدوں میں، انہوں نے مالیاتی پالیسی کے ڈیزائن، عوامی اخراجات کے جائزے، ادارہ جاتی اصلاحات اور محصولاتی اقدامات میں نمایاں کردار ادا کیا۔

اس سے قبل، تارڑ نے روم میں پاکستان کے کمرشل کونسلر کے طور پر خدمات انجام دی ہیں، جہاں انہوں نے یورپی یونین کے ساتھ تجارتی تعلقات کو فروغ دینے میں اہم کردار ادا کیا، جس کے دوران پاکستان کو جی ایس پی پلس اسٹیٹس حاصل ہوا۔

اپنی سول سروس کیرئیر کے دوران، وہ حکومت پنجاب کے سیکرٹری، آزاد جموں و کشمیر کے فنانس سیکرٹری، اور پنجاب ریونیو اتھارٹی کے ممبر کے طور پر بھی خدمات انجام دے چکے ہیں۔

فرید احمد تارڑ کے پاس الائنس مانچسٹر بزنس اسکول، یونیورسٹی آف مانچسٹر، برطانیہ سے اکاؤنٹنگ اور فنانس میں ماسٹرز ڈگری اور فنانس میں ایم بی اے کی ڈگری ہے۔ انہوں نے ترقیاتی شراکت داروں کے لیے پالیسی دستاویزات بھی مرتب کی ہیں، جن میں سندھ پبلک فنانشل مینجمنٹ ریفارم اسٹریٹجی اور سندھ ٹیکس ریونیو موبلائزیشن پلان شامل ہیں۔