عدالتی حکم پر پاکستان سروسز لمیٹڈ نے ڈائریکٹرز کے انتخابات ملتوی کردیے

پاکستان سروسز لمیٹڈ (پی ایس ای ایل) نے اعلان کیا ہے کہ اسلام آباد ہائی کورٹ (آئی ایچ سی) کی ہدایات پر 29 مارچ 2026 کو ہونے والے ڈائریکٹرز کے انتخابات ملتوی کردیے گئے ہیں۔

کمپنی نے اس پیش رفت کے بارے میں پاکستان اسٹاک ایکسچینج کو ایک نوٹس کے ذریعے آگاہ کیا ۔

نوٹس میں کہا گیا ہے کہ عدالت نے حصص کے حصول اور نئے انتخابات کے انعقاد سمیت دیگر متعلقہ نوٹسز پر عملدرآمد معطل کردیا ہے اور بعض جواب دہندگان کو کمپنی کے معاملات یا انتظامیہ میں مداخلت کرنے سے بھی روک دیا ہے۔

مزید اہم بات یہ ہے کہ عدالت نے ہدایت دی ہے کہ متنازع (زیرِ بحث) ٹرانسفرز کے عمل اور اثرات معطل رہیں گے، اور (i) حصص کی تقسیم (شیئر ہولڈنگ اسٹرکچر)، (ii) بورڈ آف ڈائریکٹرز کی تشکیل، اور (iii) کمپنی کے کنٹرول اور انتظام و انصرام کے حوالے سے اسٹیٹس کو برقرار رکھی جائے گی۔

پاکستان سروسز لمیٹڈ (پی ایس ای ایل) کو 1958 میں کمپنیز ایکٹ 1913 (جو اب کمپنیز ایکٹ 2017 ہے) کے تحت ایک پبلک لمیٹڈ کمپنی کے طور پر قائم کیا گیا تھا۔

یہ کمپنی پرل کانٹینینٹل (پی سی) کے نام سے ہوٹلوں کے ایک سلسلے کی مالک ہے اور ان کا انتظام چلاتی ہے، جبکہ یہ دیگر اداروں کو اپنا ٹریڈ مارک اور نام استعمال کرنے کے لیے فرنچائز کے حقوق بھی فراہم کرتی ہے۔