آسٹریلوی کوچ کا ورلڈ کپ کی تیاریوں کا دفاع، ناکامی کا ملبہ کھلاڑیوں پر ڈال دیا

آسٹریلوی ہیڈ کوچ اینڈریو میکڈونلڈ نے ٹی ٹوئنٹی ورلڈ کپ سے عبرتناک اخراج کا ذمہ دار کھلاڑیوں کو قرار دیتے ہوئے تیاریوں پر ہونے والی تنقید کو مسترد کر دیا ہے۔زمبابوے اور سری لنکا سے شکست کے بعد آسٹریلیا گروپ مرحلے میں ہی باہر ہو گیا، جس پر ملک بھر میں غم و غصے کی لہر دوڑ گئی۔

سابق کھلاڑیوں اور مبصرین نے ٹیم کی ناقص تیاریوں کو نشانہ بنایا ہے، کیونکہ بگ بیش لیگ کو ترجیح دینے کے باعث کئی کھلاڑی پاکستان کے خلاف وارم اپ سیریز میں دیر سے پہنچے تھے، جہاں آسٹریلیا کو 3-0 سے شکست کا سامنا کرنا پڑا۔ تاہم میکڈونلڈ نے اس تاثر کو غلط بیانیہ قرار دیا کہ آسٹریلیا اس فارمیٹ کو سنجیدہ نہیں لے رہا۔ انہوں نے کہا کہ یہ کہنا کہ ہم دیگر فارمیٹس کو ترجیح دے رہے ہیں، بالکل غلط ہے۔

پیٹ کمنز اور جوش ہیزل ووڈ جیسے اہم باؤلرز کی انجری کے باوجود کوچ کا ماننا ہے کہ دستیاب کھلاڑی جیتنے کی صلاحیت رکھتے تھے مگر وہ پرفارم کرنے میں ناکام رہے۔ میکڈونلڈ نے اعتراف کیا کہ ٹیم کی کارکردگی مایوس کن ہے اور تنقید بالکل جائز ہے لیکن اس کا ملبہ تیاریوں پر نہیں ڈالنا چاہیے بلکہ کھلاڑیوں کے کھیل کو ہی ذمہ دار ٹھہرانا چاہیے۔ آسٹریلیا آج عمان کے خلاف اپنا آخری رسمی میچ کھیل کر ٹورنامنٹ کا اختتام کرے گا۔