ڈی کوک کی جارحانہ بیٹنگ، جنوبی افریقہ نے ویسٹ انڈیز سے ٹی ٹوئنٹی سیریز جیت لی

کوئنٹن ڈی کوک کی طوفانی سنچری کی بدولت جنوبی افریقہ نے دوسرے ٹی ٹوئنٹی میچ میں ویسٹ انڈیز کو 7 وکٹوں سے شکست دے کر تین میچوں کی سیریز میں 0-2 کی فیصلہ کن برتری حاصل کر لی۔ پریٹوریا میں کھیلے گئے اس میچ میں جنوبی افریقہ نے 222 رنز کا بڑا ہدف ڈی کوک کی جارحانہ بیٹنگ کی بدولت 15 گیندیں قبل ہی باآسانی حاصل کر لیا۔

میزبان ٹیم نے ٹاس جیت کر ویسٹ انڈیز کو بیٹنگ کی دعوت دی، جس نے مقررہ 20 اوورز میں 4 وکٹوں کے نقصان پر 221 رنز بنائے۔ ویسٹ انڈیز کی جانب سے شمرون ہیٹمائر نے 75 اور برینڈن کنگ نے 49 رنز بنا کر دوسری وکٹ کے لیے 126 رنز کی شراکت قائم کی۔

اختتامی لمحات میں شرفین ردرفورڈ نے صرف 24 گیندوں پر 57 رنز کی ناقابلِ شکست اننگز کھیل کر مجموعہ مزید مستحکم کیا۔ جنوبی افریقہ کے اسپنرکیشو مہاراج نے شاندار باؤلنگ کرتے ہوئے 22 رنز دے کر 4 وکٹیں حاصل کیں اور رن ریٹ کو قابو میں رکھا۔

جواب میں جنوبی افریقہ کے کوئنٹن ڈی کوک نے میدان کے چاروں اطراف چھکوں کی برسات کر دی۔ انہوں نے صرف 43 گیندوں پر اپنی سنچری مکمل کی اور مجموعی طور پر 49 گیندوں پر 115 رنز بنائے، جس میں 10 بلند و بالا چھکے شامل تھے۔ ڈی کوک نے ریان ریکلٹن (77 رنز) کے ساتھ مل کر دوسری وکٹ کے لیے 71 گیندوں پر 162 رنز کی ریکارڈ ساز شراکت قائم کی جس نے میچ کو یکطرفہ بنا دیا۔

سیریز کا آخری میچ ہفتہ کو جوہانسبرگ میں کھیلا جائے گا، جس کے بعد دونوں ٹیمیں ٹی ٹوئنٹی ورلڈ کپ کے لیے روانہ ہوں گی۔ ورلڈ کپ میں ویسٹ انڈیز کا پہلا مقابلہ 7 فروری کو اسکاٹ لینڈ سے ہوگا جبکہ جنوبی افریقہ 9 فروری کو کینیڈا کے خلاف مہم کا آغاز کرے گا۔