اسٹیٹ بینک نے بینکوں اور ڈی ایف آئیز کیلئے ایکویٹی سرمایہ کاری کی حد میں ترمیم کردی

اسٹیٹ بینک آف پاکستان نے بینکوں اور ترقیاتی مالیاتی اداروں (ڈی ایف آئیز) کے ایکویٹی سرمایہ کاری کی حدود میں نظرثانی کردی ہے، جس کے تحت کسی ایک کمپنی کے حصص میں ان کی مجموعی سرمایہ کاری کی حد ٹئیر ون کیپیٹل کے 5 فیصد یا متعلقہ کمپنی کے ادا شدہ حصص کے 10 فیصد، ان دونوں میں سے جو بھی کم ہو، مقرر کی گئی ہے۔

اسٹیٹ بینک نے بینکوں اور ڈی ایف آئیز کی ایکویٹی سرمایہ کاری سے متعلق احتیاطی ضوابط میں ترمیم کا اعلان کیا ہے، جس میں انفرادی کمپنیوں، نئے کاروباری منصوبوں، میوچل فنڈز، رئیل اسٹیٹ انویسٹمنٹ ٹرسٹس (آر ای آئی ٹیز) اور پرائیویٹ ایکویٹی فنڈز میں سرمایہ کاری کے لیے مخصوص حدود مقرر کی گئی ہیں۔

کارپوریٹ یا کمرشل بینکاری کے احتیاطی ضوابط کے نظرثانی شدہ ریگولیشن آر 6 کے تحت کسی بینک یا ڈی ایف آئی کی کسی ایک کمپنی کے حصص میں مجموعی سرمایہ کاری اس کے ٹئیر ون کیپیٹل کے 5 فیصد یا سرمایہ کاری حاصل کرنے والی کمپنی کے ادا شدہ حصص کے 10 فیصد، ان دونوں میں سے جو بھی کم ہو، سے تجاوز نہیں کرسکے گی۔ ٹئیر ون کیپیٹل کا تعین گزشتہ ششماہی کے جائزہ شدہ یا سالانہ آڈٹ شدہ مالیاتی گوشواروں کی بنیاد پر کیا جائے گا۔

نئے کاروباری منصوبوں، بشمول مالیاتی ٹیکنالوجی سے متعلق اسٹارٹ اپس، میں سرمایہ کاری کی مجموعی حد بینک یا ڈی ایف آئی کے ٹئیر ون کیپیٹل کے 5 فیصد یا 50 کروڑ روپے، ان دونوں میں سے جو بھی کم ہو، مقرر کی گئی ہے۔

دریں اثنا میوچل فنڈز، آر ای آئی ٹیز اور پرائیویٹ ایکویٹی فنڈز کے یونٹس میں سرمایہ کاری بینک یا ڈی ایف آئی کے ٹئیر ون کیپیٹل کے 5 فیصد یا کسی ایک میوچل فنڈ، آر ای آئی ٹی یا پرائیویٹ ایکویٹی فنڈ کے یونٹس کے 20 فیصد، ان دونوں میں سے جو بھی کم ہو تک محدود ہوگی۔

اسٹیٹ بینک نے بینکوں اور ڈی ایف آئیز کو ہدایت کی ہے کہ وہ ایک منظور شدہ پالیسی وضع کریں، جس میں ایکویٹی سرمایہ کاری کے فیصلوں کے معروضی تجزیے اور جانچ کا اندرونی طریقہ کار شامل ہو۔ اس پالیسی میں مالیاتی ادارے کی مالی حیثیت، مجموعی سرمایہ کاری پورٹ فولیو، خطرات برداشت کرنے کی صلاحیت، متوقع منافع، متعلقہ مہارت اور کاروباری حکمت عملی، بشمول سرمایہ کاری سے نکلنے کی حکمت عملی کو مدنظر رکھا جائے۔

مزید برآں، اسٹریٹجک سرمایہ کاری اور تمام اقسام کے میوچل فنڈز اور پرائیویٹ ایکویٹی فنڈز کے یونٹس میں سرمایہ کاری سے پیدا ہونے والی مالیاتی ایکسپوژر کو نظرثانی شدہ ضابطے کے تحت مجموعی سرمایہ کاری کی حدود میں شامل کیا جائے گا۔ تاہم، نیشنل انویسٹمنٹ ٹرسٹ (این آئی ٹی) کے یونٹس کو ٹرسٹ کی نجکاری تک ان حدود سے مستثنیٰ رکھا جائے گا۔

ان ترامیم کے ذریعے ریگولیشن آر 6 کے پیراگراف 1 (اے) اور 1 (بی) (iv) میں تبدیلی کی گئی ہے، جو ابتدائی طور پر بی پی آر ڈی سرکلر نمبر 06 آف 2014 کے تحت جاری کیے گئے تھے اور بعد ازاں 2021 اور 2022 میں سرکلر لیٹرز کے ذریعے ان میں ترمیم کی گئی تھی۔

اسٹیٹ بینک کے مطابق اس معاملے سے متعلق دیگر تمام موجودہ ہدایات بدستور نافذ العمل رہیں گی۔

کاپی رائٹ بزنس ریکارڈر، 2026