سونا 1980 کے بعد بہترین ماہانہ کارکردگی کی جانب گامزن

جمعہ کے روز سونے کی قیمتوں میں کمی دیکھی گئی جس کی وجہ مضبوط ہوتا ہوا ڈالر تھا، تاہم مسلسل جغرافیائی سیاسی کشیدگی اور معاشی غیر یقینی صورتحال کے باعث محفوظ سرمایہ کاری سمجھے جانے والے اس دھات میں سرمایہ کاروں کی بڑھتی دلچسپی نے سونے کو 1980 کے بعد سب سے بڑے ماہانہ اضافے کی راہ پر گامزن رکھا۔

اسپاٹ گولڈ 0.9 فیصد کمی کے ساتھ 5,346.42 ڈالر فی اونس پر آ گیا، جو گزشتہ روز 5,594.82 ڈالر کی ریکارڈ سطح تک پہنچ گیا تھا۔ جنوری کے دوران اب تک سونے کی قیمتوں میں 24 فیصد سے زائد اضافہ ہو چکا ہے، جو مسلسل چھٹے مہینے اضافے کی نشاندہی کرتا ہے اور جنوری 1980 کے بعد سب سے بڑا ماہانہ اضافہ قرار دیا جا رہا ہے۔ فروری ڈلیوری کے لیے امریکی گولڈ فیوچرز 1.3 فیصد اضافے کے ساتھ 5,390.80 ڈالر فی اونس تک پہنچ گئے۔

اسپاٹ چاندی 0.2 فیصد کمی کے ساتھ 115.83 ڈالر فی اونس رہی، اگرچہ جمعرات کو یہ 121.64 ڈالر کی ریکارڈ سطح تک گئی تھی۔ چاندی کی قیمتوں میں اس ماہ اب تک 62 فیصد اضافہ ہو چکا ہے، جو اس کی تاریخ کی بہترین ماہانہ کارکردگی کی طرف اشارہ ہے۔

ڈالر انڈیکس میں معمولی اضافہ ہوا، جسے فیڈرل ریزرو کے سود کی شرح برقرار رکھنے کے فیصلے سے جزوی سہارا ملا، تاہم یہ مسلسل دوسرے ہفتے کمی کی جانب بڑھ رہا تھا۔ فیڈ چیئرمین جیروم پاول نے کہا کہ دسمبر میں مہنگائی ممکنہ طور پر مرکزی بینک کے 2 فیصد ہدف سے خاصی زیادہ رہی۔

امریکی معاشی اعداد و شمار کے مطابق بے روزگاری الاؤنس کے نئے دعووں میں کمی آئی ہے، جس سے ظاہر ہوتا ہے کہ برطرفیاں کم ہیں، تاہم کمزور بھرتیوں کے باعث صارفین لیبر مارکیٹ کے بارے میں پُرامید نہیں۔

دریں اثنا، اطلاعات ہیں کہ امریکی صدر ڈونلڈ ٹرمپ ایران کے خلاف مختلف آپشنز پر غور کر رہے ہیں جن میں سکیورٹی فورسز اور قیادت پر ہدفی حملے شامل ہو سکتے ہیں، جبکہ اسرائیلی اور عرب حکام کا کہنا ہے کہ صرف فضائی طاقت سے ایرانی قیادت کو ہٹانا ممکن نہیں۔

سوئٹزرلینڈ سے سونے کی برآمدات دسمبر میں ماہانہ بنیاد پر 27 فیصد بڑھ گئیں، جس کی بڑی وجہ برطانیہ کو ترسیل میں اضافہ تھا جو اگست 2019 کے بعد بلند ترین سطح پر پہنچ گئی۔ یو بی ایس نے بڑھتی سرمایہ کاری طلب کے پیش نظر 2026 کے لیے سونے کی قیمت کا ہدف بڑھا کر 6,200 ڈالر فی اونس کر دیا ہے۔

دوسری جانب اسپاٹ پلاٹینم 0.9 فیصد کمی کے ساتھ 2,606.15 ڈالر فی اونس رہا، جبکہ پیلیڈیم 0.5 فیصد اضافے سے 2,016.69 ڈالر تک پہنچ گیا۔